Minn Cristian Muscat
Meta tintlagħab l-aħħar ġurnata tal-Closing Round jew aħjar it-32 ġurnata tal-Malta Premier League, Floriana jiġu dikjarati champions jekk huma jirbħu lil Birkirkara.
Wara li rebħu l-Opening Round, il-Greens jinsabu viċin li jirbħu wkoll il-Closing Round u għaldaqstant jinsabu biss 90 minuta ‘l bogħod milli jirbħu t-titlu għas-27 darba fl-istorja tal-club.
Anke jekk Marsaxlokk jirbħu lil Hamrun Spartans u x-Xlukkajri jtemmu l-Closing Round bl-istess ammont ta’ punti daqs Floriana fil-quċċata tal-klassifika.
Peró, il-Greens għandhom rekord aħjar fil-konfronti diretti meta minn tlieta huma rebħu tnejn bil-partita l-oħra tispiċċa fi draw.
Min-naħa l-oħra, jekk il-Greens jonqsu milli joħorġu rebbieħa u jinqabżu fil-klassifika, ikunu jridu jinħadmu l-permutazzjonijiet:
(1) – Floriana jistgħu jir–bħu t-titlu wkoll jekk huma jispiċċaw fi draw, Marsaxlokk u Hamrun Spartans itemmu wkoll fi draw u Sliema Wanderers ma jirbħux.
(2) – Marsaxlokk jgħaddu għas-semi-finali jekk huma jirbħu u Floriana ma jirbħux jew huma jispiċċaw fi draw u Floriana jitilfu.
(3) – Sliema jikkwalifikaw għas-semi-finali jekk huma jirbħu u Floriana ma jirbħux.
(4) – Hamrun Spartans jikkwalifikaw għas-semi-finali jekk huma jirbħu u Floriana ma jirbħux.
(5) – Hibernians isibu ruħhom fis-semi-finali jekk Floriana jtemmu fi draw, Sliema jirbħu u Marsaxlokk u Hamrun itemmu fi draw.
It-tliet partiti se jintlagħbu fl-istess ħin.
Birkirkara v Floriana – Din hija l-aqwa partita tal-istaġun hekk kif Floriana jimmiraw li jirbħu s-27 titlu fl-istorja tal-club li huwa rekord.
Peró, quddiemhom se jsibu ostaklu mill-aktar diffiċli hekk kif rebħa għall-Istripes tkun tfisser li jilagħbu fis- semi-finali u li huma jifformaw wieħed mill-erba’ timijiet.
Il-Karkariżi se jkunu msaħħa bir-ritorn ta’ Sandona Agustin, Paul Mbong u Neil Micallef minn sospensjoni iżda Tomislav Papazov huwa sospiż.
Nieqes għal Floriana se jkun Carlo Zammit Lonardelli minħabba li jinsab imweġġa’.
Fil-konfronti preċedenti Floriana rebħu tnejn (3-1, 1-0) filwaqt li Birkirkara rebħu wieħed (1-0).
Mosta v Sliema W.– Sliema Wanderers jibdew favoriti li jegħlbu lil Mosta li jinsabu xxamplati fis-sitt post bħal ma temmew fl-Opening Round.
Kull team għandu player sospiż – Matthew Garcia Bolanos għall-Mostin u Vito Plut għas-Slimiżi.
Iżda Joao Victor De Souza Teixeira u Murilo Henrique se jirritornaw minn sospensjoni għal Mosta u Sliema rispettivament.
Il-Wanderers rebħu t-tliet partiti preċedenti – 2-0, 3-1, u 1-0.
Marsaxlokk v Hamrun Spartans – Dan huwa konfront mill-aktar interessanti fejn iż-żewġ timijiet jimmiraw li jirritornaw għar-rebħ hekk kif jittamaw li Floriana jiżolqu kontra Birkirkara.
Telfa tkun tfisser li jiġu eliminati minn possibbiltá ta’ semi-finali. Iżda anke jekk Floriana jirbħu l-kampjonat, rebħa tpoġġihom fil-UEFA Conference League.
Filwaqt li Marsaxlokk għandhom lil Alex De Aguiar Gomes sospiż, l-Ispartans se jinżlu bl-aqwa formazzjoni possibbli hekk kif se jkunu msaħħa wkoll bir-ritorn tad-difensur, Steve Borg.
Fiż-żewġ logħbiet diretti, iż-żewġ timijiet rebħu partita kull wieħed – Marsaxlokk 3-2 u Hamrun 6-1.