Floriana ………0
Sliema W. ……0
Minn Cristian Muscat
F’partita li ma laħqitx l-aspettattivi mixtieqa bejn żewġ rivali antiki, Floriana u Sliema Wanderers spiċċaw fi draw ta’ mingħajr goals li kkuntenta l-aktar lil-leaders Birkirkara.
Sliema kienu territorjalment aħjar, rebħu s-settur ta’ nofs il-ground u bdew jikkontrollaw l-isforzi ta’ Floriana biex il-goalkeeper, Kelvin Emeka, qatt ma ġie impenjat.
Min-naħa ta’ Floriana, kienu mingħajr ideat u l-objettiv tagħhom kien li jixħtu l-ballun lejn Franklin Saseres biex jipprovaw japprofittaw mill-veloċitá tiegħu, li iżda, kien miżmum f’morsa mid-difiża Slimiża. Barra minn hekk kienu wisq passivi fil-kostruzzjoni offensiva tagħhom.
Fit-tieni taqsima, il-Greens tjiebu iżda naqsu li jinkwadraw xutt fil-lasti. Huma bdew jaslu sa tliet kwarti ta’ ground bl-azzjonijiet bdew jisfumaw fix-xejn minħabba li ma kienux penetranti.
Wara biss ħames minuti, Sliema Wanderers setgħu skorjaw meta Dunstan Vella tilef il-ballun fil-kaxxa wara li pprova jdur bejn żewġ players, bil-ballun jaqa’ għand Mohamed Awad li minn pożizzjoni angolat falla din l-opportunitá.
Fit-18-il minuta, l-istess Awad żmarka lil Cain Attard fuq in-naħa l-oħra tal-ground li kien ġej bil-ġirja iżda x-xutt tiegħu ġie mblukkat. Fit-30 minuta, reġa’ kien Awad li pprova jaħsad lill-goalkeeper, Christoffer Mafoumbi, mid- distanza iżda falla l-mira.
Fit-38 minuta, il-Wanderers kienu sfortunati meta l-free-kick imdawwar ta’ Steve Pisani ħabat mal-wieqfa.
L-ewwel azzjoni tat-tieni taqsima waslet fit-62 minuta meta Vito Plut niżżel il-ballun lejn Wescley Matos Da Silva li minn tarf il-kaxxa ra t-tentattiv tiegħu jgħaddi ftit barra. U tliet minuti wara, mill-istess distanza ġiegħel lil Mafoumbi jdawwar f’corner bi tbatija.
Fis-70 minuta, wasal l-ewwel xutt ta’ Floriana meta Thiaginho bidel il-ballun ma’ Vella iżda xeħet għoli.
FLORIANA: 45-Christoffer Mafoumbi, 4-Oualid El Hasni, 8-Jake Grech, 9-Kemar Reid, 11-Thiago Dos Santos Nascimento, 12-Dunstan Vella, 20-Matias Nicolas Garcia, 27-Franklin Sasere, 55-Alexandros Kouro, 70-Fernando De Araujo, 79-Guy Serge Tameogo – Coach: Darren Abdilla
SLIEMA W.: 12-Kelvin Agu Emeka, 2-Jean Borg, 9-Vito Plut, 11-Myles Beerman, 15-Gustavo Alcino, 20-Wescley Matos Da Silva, 22-Cain Attard (7-Adam Magro Overend 77), 31-Murilo Henrique Bernardo, 42-Simon Zibo, 70-Steven Pisani (18-Sergio Ramos Da Silva 85), 77-Mohamed Abdulahi Awad – Coach: Paul Zammit
REFEREE: Glen Tonna
ASS. REFEREES: Duncan Sultana, Kurt Saliba
RABA’ UFF: Malcolm Spiteri
SKORER: xxx
AMMONITI: S. Zibo, M. Henrique (SW); M. Garcia (F)
