Is-saċerdot Malti li jgħix l-Awstralja Fr Rob Galea se jkun l-artist prinċipali fil-Jum Dinji taż-Żgħażagħ li se ssir fil-4 t’Awwissu fil-kapitali Portugiża Lisbona.
Il-midja internazzjonali qiegħda tirrapporta li Fr Rob Galea ntgħażel minn diversi artisti oħrajn biex ikun hu li jkanta waqt dan il-jum li fih mistennija jiltaqgħu eluf kbar ta’ żgħażagħ.
Għal din l-okkażżjoni, Fr Galea kkompona kanzunetta ġdida bl-isema ta’ “Emmanuel forever” u li se tkun qiegħda tindaqq għall-ewwel darba dakinhar quddiem il-Qdusija Tiegħu Papa Franġisku.
Ma’ Fr Galea se jkun qiegħed jingħaqad artist ieħor kbir Shevin McCullough li flimkien se jagħtu spettaklu uniku f’Lisbona.
Grupp ta’ żgħażagħ Maltin u Għawdxin fl-ewwel ġimgħa t’Awwissu se jkunu qegħdin iħallu pajjiżna biex jingħaqdu ma’ eluf oħra biex fi kliem l-organizzaturi “jesperjenza l-imħabba u d-diversità bejn il-ġnus kollha tad-dinja.”
