Il-bidu mhux daqstant pożittiv ta’ Roma fil-kampjonat Taljan qed iġiegħlu lid-diriġenza ta’ Roma sabiex isaħħu iktar il-lat amministrattiv tagħhom. Skont id-diriġenti Giallorossi, l-iskwadra għad-dispożizzjoni ta’ Jose Mourinho hi qawwija biżżejjed biex tegħleb dan il-mument mhux daqstant pożittiv hekk kif kisbu punt biss minn tliet logħbiet.
Sadanittant skont sit elettroniku Taljan, il-familja Friedkin li hi s-sid ewlenija ta’ AS Roma jridu lura leġġenda Giallorossa u dan m’hu ħadd ħlief Francesco Totti. Dan tal-aħħar kien telaq mill-kumitat tal-klabb minħabba xi differenzi li kellu mas-sid l-ieħor James Pallotta.
Minkejja kollox, hu jixtieq jerġa’ jidħol fid-diriġenza tal-klabb u ma tkunx ħaġa kbira li jagħmel dan fil-ġimgħat li ġejjin.
