Frank Lampard inħatar manager ta’ Chelsea sal-aħħar tal-istaġun – ftit aktar minn sentejn wara li tkeċċa mill-istess club.
Huwa ngħata t-tmexxija tat-team wara t-tkeċċija ta’ Graham Potter nhar il-Ħadd.
Lampard, li ilu bla xogħol minn meta tkeċċa minn Everton f’Jannar, qabel kien imexxi lill-Blues minn Lulju 2019 sa Jannar 2021.
Chelsea jinsabu fil-11-il post fil-Premier League u s-Sibt imorru jilagħbu għand Wolves.
Huma jinsabu 14-il punt taħt Manchester United, li jinsabu fir-raba’ post, minkejja li nefqu aktar minn £550 miljun fuq players ġodda dan l-istaġun, iżda għaddew għall-kwarti tal-finali taċ-Champions League u se jiffaċċjaw lil Real Madrid fl-ewwel leg, nhar l-Erbgħa.
Il-koproprjetarji Todd Boehly u Behdad Eghbali qalu li l-eks midfielder tal-Pensioners, Lampard, se jieħu t-tmexxija filwaqt li jkomplu bil-proċess biex jiġi ngaġġat coach permanenti.
“Irridu nipprovdu lill-club u lill-partitarji tagħna pjan ċar u stabbli għall-bqija tal-istaġun,” qalet stqarrija maħruġa mill-club.
“Irridu nagħtu lilna nfusna kull ċans ta’ suċċess u Frank għandu l-karatteristiċi u l-kwalitajiet kollha li għandna bżonn biex imexxina sal-linja finali.”
Fil-perjodu maniġerjali preċedenti tiegħu ma’ Chelsea, Lampard kien inħatar taħt embargo ta’ trasferiment iżda ggwidahom lejn ir-raba’ post u l-finali tal-FA Cup fl-ewwel staġun tiegħu fit-tmexxija.
Wara li nefaq £200 miljun fis-sajf ta’ wara fuq seba’ players ġodda, inklużi l-players attwali Ben Chilwell u Kai Havertz, ma setax jirreplika l-wegħda bikrija u tkeċċa mis-sid preċedenti Roman Abramovich bit-team jinżel fis-seba’ post tal-klassifika wara li rebaħ biss tnejn minn tmien logħbiet preċedenti tagħhom.
Huwa ġie sostitwit minn Thomas Tuchel, li wassal lil Chelsea għar-rebħa fil-finali taċ-Champions League erba’ xhur wara.
