Franza se tkun l-ewwel pajjiż tal-G7 li tirrikonoxxi uffiċjalment l-Istat Palestinjan u dan se tagħmlu bi stqarrija quddiem in-Nazzjonijiet Uniti f’Settembru li ġej.
Ħabbar dan il-President Franċiż Emmanuel Macron, li f’post fuq il-midja soċjali ddikjara li din id-deċiżjoni hi konsistenti mal-impenn storiku ta’ Franza għal paċi ġusta u dejjiema fil-Lvant Nofsani.
Waqt li sejjaħ għal waqfien immedjat mill-ġdid u r-rilaxx tal-ostaġġi kollha, Macron żied jgħid li “rridu nibnu Stat tal-Palestina, niggarantixxu l-vijabbiltà tiegħu u niżguraw li billi naċċettaw id-demilitarizzazzjoni tiegħu u nirrikonoxxu bis-sħiħ lil Iżrael, dan jikkontribwixxi għas-sigurtà ta’ kulħadd fir-reġjun.”
L-uffiċjali Palestinjani laqgħu d-deċiżjoni ta’ Macron, iżda l-Prim Ministru ta’ Iżrael Benjamin Netanyahu qal li din se tkun qiegħda “tippremja t-terrur”. Fl-istess waqt, is-Segretarju tal-Istat Amerikan Marco Rubio sejjaħ din id-deċiżjoni bħala “bla ħsieb”.