FRANZA…………….4
AWSTRALJA………1
Wara ħasda inzijali, Franza rriżultaw bħala wisq b’saħħithom għall-Awstralja meta għelbuhom bl-iskor kbir ta’ 4-1.
Kienu l-Awstralja li fetħu l-iskor proprju fl-ewwel azzjoni perikoluża li ħolqu fid-disa’ minuta meta Mathew Leckie xeħet pass li qata’ lid-difiża Franċiża lejn CRAIG GOODWIN li minn pożizzjoni ferm ideali spara l-ballun fis-saqaf attxibka.
Iżda l-Franċiżi ma rmewx ix-xugaman anzi wettqu reazzjoni mill-aqwa u ta’ dan ġew ippremjati meta fis-27 minuta ġabu l-iskor indaqs meta Theo Hernandez xeħet cross li sab lil ADRIEN RABIOT żmarkat li b’daqqa ta’ ras mill-viċin tefa’ ġewwa
Huma komplew jiddettaw il-logħob u ħames minuti biss wara qalbu l-iskor favurihom meta l-awtur tal-ewwel goal Adrien Rabiot approfitta minn indeċiżjoni fid-difiża tal-Awstralja, qabel serva fuq platt tal-fidda lill-iskorer prolifiku veteran ta’ 36 sena OLIVIER GIROUD li kważi minn fuq il-penalty spot tefa’ l-ballun f’lasta vojta.
U jidher li l-Franċiżi ma kinux kuntenti biżżejjed b’dan l-iskor hekk kif fit-68 minuta skorjaw it-tielet goal, meta wara li rċieva minn cross pinġut ta’ Ousmane Demebele, KYLIAN MBAPPE kien fil-post it-tajjeb fil-mument opportun u permezz ta’ daqqa ta’ ras preċiża tefa’ l-ballun fir-rokna tax-xibka, bil-ballun jaħbat mal-wieqfa qabel intemm ġewwa.
Kulma jmur kompla d-dominju assolut ta’ Franza u fil-71 minuta, skorjaw ir-raba’ goal biex issiġillaw ir-rebħa meta Kylian Mbappe avvanza tajjeb, indirizza cross għan-nofs li sab lil OLIVIER GIROUD li permezz ta’ daqqa ta’ ras preċiża minn taħt il-lasta tefa’ ġewwa biex b’hekk irreġistra doppjetta personali.
Franza: Hugo Lloris, Benjamin Pavard (Jules Kounde 88), Ibrahima Konate, Upamecano, Lucas Hernandez (Theo Hernandez 13), Aurelien Tchouameni (Youssouf Fofana 77), Antoine Griezmann, Adrien Rabiot, Ousmane Dembele (Kingsley Coman 77), Olivier Giroud (M. Thuram 89), Kylian Mbappe
Awstralja: Mathew Ryan, Nathaniel Atkinson (Milos Degenek 85), Harry Souttar, Kye Rowles, Aziz Behich, Aaron Mooy, Jackson Irvine (Keanu Baccus 85), Riley McGree (Awer Mabil 73), Mathew Leckie, Mitchell Duke (Jason Cummings 56), Craig Goodwin (Garang Kuol 74) Coach: Graham Arnold
Referee: Victor Gomes (Afrika t’Isfel)
Assistenti: Zakhela Siwele, Souru Phatsoene (Afrika t’Isfel)
Ammoniti: M. Duke, J. Irvine, A. Mooy (A)
