Is-seed numru 4, Casper Ruud, għadda għas-semi-finali għat-tieni sena konsekuttiva wara rebħa missielta kontra d-Daniż, Holger Rune.
In-Norveġiż, li tilef kontra Rafael Nadal fil-finali tas-sena l-oħra, rebaħ konfront affaxxinanti ta’ erba’ sets, 6-1 6-2 3-6 6-3.
Ma kien hemm xejn mit-tilwim tal-partita tas-sena l-oħra bejn il-koppja, b’Ruud jilqa’ tajjeb għall-isforz tard minn Rune biex imur għar-rebħa.
Illum wara nofsinnhar Ruud se jilgħab kontra l-Ġermaniż, Alexander Zverev, għal post fil-finali.
L-eks numru 2 tad-dinja, Zverev, aktar kmieni nhar l- Erbgħa għeleb lil Tomas Martin Etcheverry tal-Arġentina, 6-4 3-6 6-3 6-4, biex wassal għal ritorn emozzjonali f’Roland Garros.
Zverev se jiffaċċja l-aktar test diffiċli tiegħu s’issa kontra Ruud, filwaqt li n-numru wieħed tad-dinja, Carlos Alcaraz, jilgħab kontra ċ-champion 22 darba, Novak Djokovic, fis-semi-finali l-oħra tal-lum.
