Fi tmiem din il-ġimgħa ntemm uffiċjalment it-tieni round tal-Enemed Futsal League fejn mill-ġimgħa li ġejja, il-kampjonat dieħel f’fażi interessanti bil-logħbiet mill-play-offs.
Fil-fatt iċ-champions Luxol se jilagħbu kontra l-Universita’ ta’ Malta filwaqt li Swieqi United jaffaċċjaw lil Ta’ Xbiex f’semifinali fuq żewġ legs.
Matul din il-ġimgħa kompla l-logħob fejn Luxol għelbu lil Swieqi 4-3 f’logħba ferm akkanita u indeċiża sal-aħħar.
Il-captain Mark Zammit skorja doppjetta filwaqt li Maicon u Celino Alves ukoll niżżlu isimhom fost l-iskorers.
Swieqi baqgħu fil-logħba b’gowls ta’ Justin Theuma li kien awtur ta’ doppjetta u Dylan Pirotta.
Referees: Andrea Naudi, Jude Amin Utulu, Jonathan Balzan.
L-Universita’ ippreparaw bl-aqwa mod possibbli għall-play-offs hekk kif rebħu lil Ta’ Xbiex bl-iskor kbir ta’ 8-1.
Kif jindika l-iskor, l-Universitarji ddominaw dan il-konfront bl-ewwel taqsima li kienet waħda ferm pożittiva għalihom.
Gia Nikvashvili skorja tripletta, Mohammed Elamari u Aaron Montebello kienu awturi ta’ doppjetta filwaqt li Leo Muscat niżżel ismu fil-ktieb tal-iskorers.
Ta’ Xbiex skorjaw il-gowl ta’ konsolazzjoni permezz ta’ Dale Valletta.
Referees: Pierre Bonnici, Jude Amin Utulu, Danilo Francalanza.
Mill-Enemed Challenger League, spikkat ir-rebħa kbira tat-tim nazzjonali Malti ta’ taħt id-19-il sena wara li għelbu lil Fgura United 10-0.
Iż-żgħażagħ Maltin kienu fi klassi għalihom hekk kif kisbu wkoll l-akbar rebħa tagħhom matul dan l-istaġun.
Ivin Gatt skorja tripletta, Amin Louati u Shiraz Attard wettqu doppjetta filwaqt li Collin Sammut u Nathan Balzan għenu wkoll f’din ir-rebħa tant sabiħa.
Referees: Andrea Naudi, Luca Formosa, Monika Dashtevska.
St George’s aċċertaw l-ewwel post tal-klassifika fi tmiem it-tieni round wara li għelbu lil Marsaskala 6-4 fil-konfront dirett tan-naħa ta’ fuq.
Kif mistenni kienet logħba sabiħa bil-Bormliżi li kellhom dik ix-xi ħaġa aħjar mill-avversarji tagħhom.
Vuk Rankovic u Karl Luke Schembri skorjaw doppjetta kull wieħed bi Claudio Venuto u Matthew Scicluna jżidu aktar gowls għall-Bormliżi.
Gowls ta’ Amir Ashtiyani (doppjetta personali), Matthias Camilleri u Ismael Tabone żammew lill-Iskalin fil-logħba.
Referees: Jude Amin Utulu, Danilo Francalanza, Pierre Bonnici.
KLASSIFIKA – ENEMED FUTSAL PREMIER LEAGUE
Luxol St Andrews 36, Swieqi United 28 , Ta’ Xbiex 25, L-Universita’ ta’ Malta 24, Żurrieq Futsal 18
KLASSIFIKA– ENEMED CHALLENGER LEAGUE
St George’s 25, Marsaskala 18, Fgura United , Malta U19 6, Malta Veterans 0
