Filwaqt li l-kampjonat tal-Futsal maskili jinsab temporanjament wieqaf minħabba l-impenji Ewropej u dawk tan-nazzjonal, dan il-weekend kellna tliet logħbiet mill-kampjonat femminili.
Il-partita bejn Parr Mela Rockets u St Andrews spiċċat bi rebħa ta’ 4-2 favur St Andrews. Dawn tal-aħħar marru fuq vantaġġ komdu ta’ 0-4, iżda r-rimonta ta’ Parr Mela Rockets bdiet tard wisq u ma rnexxilhomx iġibu l-iskor mixtieq.
St George’s Futsal kisbu t-tieni rebħa konsekuttiva fil-kampjonat tagħhom, din id-darba kontra Luxol Sports Club Futsal Argus, b’riżultat ta’ 5-3. Bit-tim ta’ Bormla jikkonferma s-saħħa tiegħu għal dan l-istaġun, St George’s issa jinsabu fl-ogħla pożizzjoni fil-klassifika.
Min-naħa l-oħra, Zero Sei Futsal irnexxielhom jitilgħu wkoll fl-ewwel post tal-klassifika wara rebħa ta’ 4-1 kontra Swieqi United Futsal LEC07, fejn erba’ plejers differenti sabu x-xibka. Id-differenza fil-gowls żammet lil Zero Sei fil-quċċata flimkien ma’ St George’s.
Wara Matchweek 2, il-klassifika tal-kampjonat turi lil St George’s Futsal u Zero Sei Futsal fl-ewwel żewġ postijiet b’sitt punti kull wieħed. Wara tagħhom hemm Luxol Sports Club Futsal Argus u St Andrews Futsal bi tliet punti, filwaqt li Swieqi United Futsal LEC07 u Parr Mela Rockets Futsal għadhom ifittxu l-ewwel punti tal-istaġun.
Fit-tielet ġimgħa tal-kampjonat (Matchweek 3), St Andrews se jilagħbu kontra Luxol Sports Club Futsal Argus nhar it-Tlieta 11 ta’ Novembru, filwaqt li Zero Sei Futsal se jaffaċċjaw lil Parr Mela Rockets Futsal l-Erbgħa filgħaxija. Fl-istess jum, St George’s Futsal se jiltaqgħu ma’ Swieqi United Futsal LEC07.