Is-Sibt 28 ta’ Frar 2026 intlagħbu l-finali tal-Enemed Super Cup fil-National Sports School, quddiem attendenza sabiħa ta’ partitarji li mlew il-venue u taw atmosfera mill-aqwa għaż-żewġ partiti. Il-ġurnata kienet waħda storika hekk kif il-Futsal Video Support (FVS) għamel id-debutt uffiċjali tiegħu fil-kompetizzjoni tas-Super Cup.
Finali Femminili
Swieqi United Futsal LECO7 v Zero Sei Futsal
Zero Sei Futsal kitbu l-istorja hekk kif għelbu lil Swieqi United Futsal LECO7 bl-iskor ta’ 6-0 biex rebħu s-Super Cup għall-ewwel darba.
Il-gowls ta’ Zero Sei waslu permezz ta’ Amanda Cristina Luiz (2), Vanessa Honoria Carneiro (2), Laura Andrea Echeverri Tobon u Rocio Robles, li kollha kellhom prestazzjoni mill-aqwa biex wasslu lit-tim tagħhom għal suċċess storiku.
Din il-finali rat ukoll l-introduzzjoni tal-FVS fil-kompetizzjoni femminili. Minkejja li s-sistema kienet disponibbli, ma kien hemm l-ebda talba għal review matul il-partita.
Finali Maskili
Luxol St Andrews Futsal Club v University of Malta Futsal
Fil-finali maskili, Luxol St Andrews Futsal Club rebħu 7-3 kontra University of Malta Futsal, f’konfront ieħor intens bejn iż-żewġ rivali.
Luxol fetħu vantaġġ ta’ 4-0 sal-mistrieħ u baqgħu jikkontrollaw il-partita. University of Malta Futsal irreaġixxew fit-tieni taqsima u rnexxielhom inaqqsu d-distakk, iżda Luxol baqgħu effettivi quddiem il-lasta biex issiġillaw ir-rebħa.
Il-gowls għal Luxol waslu minn Cristian Jose Fernandez (2), Cleaven Portelli (2), Michael Borg, Nathan Cope u Rodrigo Rocha, filwaqt li University of Malta Futsal skorjaw permezz ta’ Rodrigo Jose Da Silva Rodrigues, Andre Cachia u Steven Camilleri.
Il-partita rat ukoll l-użu tal-FVS darbtejn. University of Malta Futsal talbu review fuq l-ewwel gowl ta’ Luxol, iżda d-deċiżjoni oriġinali ġiet ikkonfermata u l-gowl baqa’ validu. Aktar tard, Luxol talbu review fuq gowl skorjat minn University of Malta Futsal, li wara verifika ġie mħassar.
