Luxol Sports Club Futsal Argus u Zero Sei bdew l-impenji tagħhom fis-semifinali tal-Enemed Women’s Futsal League b’rebħiet importanti fl-ewwel leg, biex issa jinsabu pass eqreb lejn post fil-finali.
Luxol Sports Club Futsal Argus kisbu rebħa ta’ 3-1 kontra St George’s f’konfront bilanċjat. Jasmine Vella Turner fetħet l-iskor favur Luxol, iżda Shania Spiteri wieġbet biex ġabet l-iskor indaqs għat-tim tagħha. Minkejja dan, Vella Turner reġgħet kienet determinanti meta skorjat it-tieni gowl tagħha, filwaqt li Ruth Steer Cheetham għamlet żgur mit-tliet punti b’gowl ieħor lejn it-tmiem. It-tieni leg bejn dawn iż-żewġ naħat huwa skedat għal nhar l-Erbgħa 15 ta’ April.
Zero Sei wrew is-saħħa offensiva tagħhom meta għelbu lil Swieqi United Futsal bl-iskor ta’ 6-3. Vanessa Carneiro spikkat b’mod partikolari hekk kif skorjat tliet gowls, filwaqt li Rocio Robles żiedet żewġ gowls oħra. Nicole Espinosa wkoll ikkontribwiet b’gowl biex kompliet tkabbar il-vantaġġ għat-tim tagħha. Swieqi United ippruvaw jibqgħu fil-logħba b’doppjetta ta’ Juciela Vale u gowl minn Carolina Mendosa, iżda ma kienx biżżejjed biex jevitaw it-telfa. It-tieni leg ta’ din il-partita se jintlagħab nhar it-Tlieta 14 ta’ April.