Il-coach ta’ Real Madrid, Carlo Ancelotti, ikkonferma li l-winger Gareth Bale se jħalli lil Los Blancos meta jiskadi l-kuntratt tiegħu fis-sajf li ġej.
Il-player minn Wales sofra staġun milqut minn injury din is-sena, fejn għamel biss erba’ dehriet fil-La Liga u ġie utilizzat minn Real Madrid nhar is-Sibt li għadda għall-ewwel darba minn Awwissu.
Bale se jkun ħerqan li jikseb lura l-aqwa forma qabel il-partiti ta’ kwalifikazzjoni ta’ Wales għat-Tazza tad-Dinja f’Marzu, u issa se jkun qed ifittex ukoll li jtemm il-karriera tiegħu fil-Bernabeu bl-aħjar mod possibbli.
Ancelotti qal li: “Bale kellu injuries u se jkun qed jintemmlu l-kuntratt fis-sajf li ġej – forsi ma kellux motivazzjoni tajba iżda jrid itemm il-karriera tiegħu mal-Madrileni kif jixraqlu. Huwa importanti li Bale itemm il-karriera tiegħu tajjeb hawnhekk iżda sfortunatment naħseb li mhux se jkun qed iseħħ hekk.”
Il-player ta’ 32 sena rritorna fil-Premier League għal perjodu qasir l-istaġun li għadda meta ngħaqad lura ma’ Tottenham Hotspur b’self, u qed jingħad li l-pass li jmiss tiegħu jista’ jkun ritorn ieħor mal-Lilywhites.
Bale rebaħ bosta unuri matul il-perjodu ta’ disa’ snin tiegħu ma’ Real Madrid, fejn b’kollox rebaħ 17-il titlu, inklużi erba’ edizzjonijiet taċ-Champions League.
