Il-ġenoċidju li għaddej bih Iżrael fil-Medda ta’ Gaża rifless fil-qtil, fil-massakri ta’ eluf kbar ta’ Palestinjani ta’ kull età, minn trabi sa xjuħ, tkissir, tifrik u qerda ma’ kullimkien jaf bih kulħadd. Ma’ dan hemm il-ġuħ u l-għatx, kawżati minn atroċitajiet ta’ Iżrael li ma jħallux li titwassal għajnuna umanitarja. Kundanna verbali mingħand tista’ tgħid kulħadd. Imma s’hemm naslu.
Il-midja, lokali u barranija, f’kull forma tagħha, miżgħuda b’kitbiet dwar din il-ġrajja kerha kurrenti. Riċentement, eżattament nhar il-Ġimgħa, 15 ta’ Awwissu – Jum Santa Marija – laqatni artiklu tal-Avukat Paul Borg Olivier, eks-Segretarju Ġenerali tal-Partit Nazzjonalista, fil-ġurnal ‘Times of Malta’ intitolat A new Operation Pedestal needed. It-titlu jinkorpora l-ġrajja storika ta’ Jum Santa Marija fl-1942, fl-eqqel tat-Tieni Gwerra Dinjija, il-wasla ta’ dak li baqa’ magħruf bħala Il-Konvoj ta’ Santa Marija. Operazzjoni Pedestal. Malta kienet waslet biex tispiċċa f’idejn il-Ġermanja Nażista għax kienet nieqsa minn kollox. Niesna kienu fi kriżi umanitarja. Konvoj li ma salvax biss lil Malta imma kienet wasla strumentali u divina li b’riżultat tagħha l-attwalità ta’ dakinhar ħadet żvolta differenti.
Fl-artiklu tiegħu l-Avukat Borg Olivier jgħid li llum qegħdin naraw kriżi umanitarja differenti, imma mhux inqas gravi, tiżvolġi f’Gaża. Iżid jikteb li waqt li għaddej dan kollu r-reazzjoni tal-Unjoni Ewropea hija waħda passiva, iżżomm lura u siekta. Isostni li tali falliment milli taġixxi b’mod deċiżiv l-Unjoni Ewropea qegħda tittradixxi l-prinċipji kif simbolizzati mill-Operazzjoni Pedestal, mill-Konvoj ta’ Santa Marija. F’dan l-isfond, l-Avukat Borg Olivier kien kritiku ħafna għal Roberta Metsola, President tal-Parlament Ewropew u għal Ursola von der Leyen, President tal-Kummissjoni Ewropea.
Imma qabel inkompli dwar dan l-artiklu rrid ngħid li dan ma kienx l-ewwel artiklu tax-xorta tiegħu min-naħa tal-Avukat Borg Olivier. Ma kinetx l-ewwel darba li kien kritiku fil-konfront ta’ Roberta Metsola dwar dan is-suġġett. F’Lulju li għadda kien diġà kiteb fuq din il-linja.
Jidher ċar li kien hemm min mill-kamp ta’ Roberta Metsola li ma tantx ħa gost b’tali kitba. Fost dawn kien hemm l-Avukat Andrew Borg Cardona. F’artiklu pubblikat fil-ħarġa tat-‘Times of Malta’ tas-Sibt, 2 ta’ Awwissu 2025, intitolat Roberta Metsola’s balancing act l-Avukat Borg Cardona ħareġ jiddefendiha qatta’ bla ħabel lil Roberta Metsola. Attakka lil dawk li jikkritikawha fuq dan is-suġġett. Għamel dan bla ma semma’ lil ħadd b’ismu. Jekk trid tifhem ir-ruħ. Lil dawn il-kritiċi sejħilhom bħala leġjun ta’ kritiċi u aktar tard jgħid li fosthom hemm opportunisti.
L-Avukat Borg Cardona kiteb li bħala President tal-Parlament Ewropew Roberta Metsola tokkupa waħda mill-ogħla karigi fl-Unjoni Ewropea. Madankollu l-kariga tagħha hija aktar simbolika milli eżekuttiva. Qal li Metsola mhux Prim Ministru jew Ministru għall-Affarijiet Barranin, imma, aktar hija l-kustodja tal-vuċi tal-parlament, istituzzjoni li hi stess m’għandha ebda setgħa diretta fuq il-politika barranija. Din tibqa’ mgħassa mill-Kunsill Ewropew u mill-gvernijiet nazzjonali.
Żied jikteb li “f’dawn ir-restrizzjonijiet, Metsola konsistentement pruvat issostni l-valuri Ewropej, anke jekk l-aspettattivi mpoġġijin fuq spallejha ħafna drabi jeċċedu l-mandat tagħha. Tali tensjoni mkien ma hija aktar evidenti mill-pożizzjonijiet pubbliċi li ħadet fuq l-Ukrajna u Gaża.”
Lura għall-artiklu A new Operation Pedestal needed tal-Avukat Borg Olivier. Jikkwota lil Josep Borrell, il-President preċedenti tal-Parlament Ewropew, bħala li esprima bil-miftuħ il-frustrazzjoni tiegħu għal nuqqas ta’ azzjoni Ewropea magħquda biex ittaffi t-tbatijiet f’Gaża.
Iżid jikkwota lil Borrell jgħid li l-Ewropa qed tissogra titlef il-boxxla morali tagħha jekk iddawwar wiċċha minn fuq dan il-ġenoċidju u traġedja umana.
L-Avukat Borg Olivier isaħħaħ l-argument tiegħu billi jikkwota wkoll lill-eks-Kummissarju Ewropew Malti Tonio Borg bħala li esprima l-istess tħassib Jikkwotah jgħid li “huwa dmir tagħna li ngħollu leħinna kontra dan il-ġenoċidju bla sens ta’ nies Palestinjani ċivili u li ħadd minna m’għandu jkun ittimbrat bħala antisemitiku talli nqumu kontra il-massakru ta’ ħajjiet innoċenti mill-Gvern ta’ Iżrael.”
L-Avukat Borg Olivier ma darx mal-lewża: “Dak li jżid saff morr ta’ ironija ma’ dan in-nuqqas huwa li llum it-tmexxija tal-Unjoni Ewropea hija maqsuma bejn Malta u l-Ġermanja, rappreżentati minn Roberta Metsola, President tal-Parlament Ewropew, u Ursula von der Leyen, President tal-Kummissjoni Ewropea. Matul it-Tieni Gwerra Dinjija l-Ġermanja attakkat bla qies lil Malta, ikkawżat qerda devastanti fil-gżira. Madankollu, illum, dawn iż-żewġ mexxejja mill-Ġermanja u minn Malta donnhom qegħdin jiżfnu t-tango għar-ritmu ta’ Iżrael, jiżfnu passi li jevitaw milli jieħdu pożizzjoni ċara u bi prinċipju li jitfgħu r-responsabbiltà fuq Iżrael għall-makabrità tal-kriżi umanitarja li kkawża fuq Gaża u niesha. B’din il-korjografija ta’ kawtela u allineament politiku qegħdin jissograw li jdawru l-awtorità morali Ewropea fi prestazzjoni ta’ nuqqas ta’ azzjoni.”
L-Avukat Borg Olivier iżid jikteb li “id-dinja tibqa’ tgħasses biex tara jekk l-Ewropa hux se tqum għall-ogħla ideali tagħha jew jekk hux se tibqa’ tirtira f’kawtela politika. Jekk il-mexxejja tagħha jonqsu milli verament iqumu u juru li qegħdin hawn u jieħdu azzjoni deċiżiva, se jaqgħu minn fuq il-pedestall tagħhom.”
Temm kitbietu billi kkwota mill-editorjal tal-gazzetta ‘The Sunday Times of Malta’ tal-Ħadd, 27 ta’ Lulju, 2025, “waqt li Gaża tmut bil-ġuħ, l-UE qegħda (għadha) fuq btala”.
NOTA TAL-AĦĦAR: Biex ma jkunx hemm min jakkużani li kont selettiv fil-kwotazzjonijiet tiegħi mill-artiklu tal-Avukat Paul Borg Olivier, iva jikkritika wkoll lill-Prim Ministru Robert Abela u jgħid li dak li kiteb fil-konfront ta’ Metsola “japplika l-istess għal Robert Abela li jibqa’ jgħid li Malta se tirrikonoxxi l-iStat Palestinjan f’Settembru. Għaliex jistenna li jkun tard wisq?”
%%%%%%%%
Ripetizzjoni ta’ x’ġara sena ilu eżatt!
Eżattament sena ilu, il-Ħadd 25 ta’ Awwissu 2024, minn din il-paġna kont ikkummentajt dwar tniġġiż kawżat fil-bajja ta’ Ħondoq ir-Rummien, il-Qala Għawdex, minn dak li joħroġ mill-irziezet tat-tonn. Kont kritiku ħafna u ma jiddispjaċini xejn għal dan. Aktar u aktar wara li fil-jiem li għaddew kellna ripetizzjoni ta’ dan it-tniġġiż, jekk mhux f’Ħondoq ir-Rummien f’postijiet oħrajn. U naturalment l-istess skużi, l-istess ‘apoloġiji’, sfurzati jew le, mis-sidien tal-irziezet tat-tonn. Jgħaddu ftit jiem u l-istorja tmut fuq ommha! Barra bid-daqq!
Nixtieq li, jekk il-Bambin iħallini magħkom, sena oħra ma nkunx kostrett li nirrepeti dawn il-paragrafi.
Nixtieq li VERAMENT tittieħed azzjoni minn kull min hu b’xi mod responsabbli, biex nuru li VERAMENT tgħallimna. Imma sinċerament, niddubita.