George Degiorgio, li flimkien ma’ ħuh Alfred qed jiskontaw piena ta’ 40 sena ħabs għall-involviment tagħhom fil-qtil ta’ Daphne Caruana Galizia, iddikjara fil-Qorti li huwa ammetta l-akkużi biex jevita milli jmur għomru l-ħabs.
Huwa kien qed jixhed quddiem l-Imħallef Audrey Demicoli fil-kawża li hu u ħuh fetħu fejn qed jitolbu li l-ġuri tagħhom jerġa’ jinstema’ mill-ġdid fejn qed jallegaw nuqqas ta’ smigħ xieraq.
Fuq il-pedana tax-xhieda, George Degiorgio qal li fl-14 ta’ Ottubru li għadda, fil-ġurnata li kellu jibda l-ġuri, huwa ra lil ħuh jinħareġ miċ-ċella fuq stretcher għall-ħabta tas-6.30 a.m.
“Wasalt fil-lock up tal-Qorti. Xi kwarta jew għoxrin minuta wara ġie ħija, li kien fuq siġġu tar-roti. Provajt inkellmu iżda ma kienx qed iwieġeb. Għedt lill-uffiċjali korrettivi: hekk iġġibu il ħija fil-Qorti?”, kompla jgħid Degiorgio.
Qal li mbagħad hu u ħuh iddaħħlu fl-awla, “bl-Imħallef Edwina Grima tgħidli li kienet se tibda xorta waħda. Tant kont ixxukkjat li lanqas stajt nisma’ aktar.”
Imbagħad intgħażlu l-ġurati u l-Avukat Ġenerali għamel id-diskors ta’ introduzzjoni tiegħu, qabel il-ġuri waqaf f’nofsinhar. Degiorgio qal li: fin-nofsiegħa ta’ waranofsinhar ġie l-Avukat Simon Micallef Stafrace biex ikellimni. Ried ikompli. Jien għedtlu: inkomplu? Għadek kemm iddikjarajt li m’intix lest.”
Degiorgio qal li mbagħad l-avukat tiegħu kien qallu li f’dak il-punt kellu żewġ għażliet: jew li jitlef il-ġuri u jeħel għomor il-ħabs, jew jammetti u jieħu sentenza mnaqqsa. “Jiena għedtlu, se jkolli nwieġeb għal ħija wkoll? Ħares ftit lejh,” qal ix-xhud.
L-avukat imbagħad kien tkellem mal-Avukat Ġenerali u informa lil Degiorgio li l-patteġġjament kien dak li jiskonta 40 sena ħabs. “Baxxejt rasi u għedtlu biex immexxu għax kont għajjien,” qal ix-xhud. Kien f’dan il-mument li qal li ħa d-deċiżjoni li jammetti għax “ma kellux għażla oħra.”
Il-każ ikompli f’Mejju.
L-Avukati Maurizio Cordina u Carina Bugeja Testa qed jidhru għall-Avukat Ġenerali u l-Avukat tal-Istat f’dawn il-proċeduri. L-Avukati Leslie Cuschieri u Noel Bianco dehru għall-aħwa Degiorgio.
