André Rieu, magħruf bħala André Rieu, twieled fil-1 ta’ Ottubru 1949 f’Maastricht, l-Olanda. Huwa vjolinist u direttur magħruf mad-dinja kollha, li kiseb fama speċjali bħala “Ir-Re tal-Valzer”.
Minn ċkunitu wera interess fil-mużika, influwenzat ukoll minn missieru li kien direttur ta’ orkestri. Beda jdoqq il-vjolin f’età żgħira u kompla l-istudji tiegħu fil-Conservatoire ta’ Maastricht u mbagħad fil-Konservatorju ta’ Brussell, fejn kiseb diploma prestiġjuża fil-vjolin.
Fis-snin 70 daqq f’orkestri klassiċi iżda malajr beda joħloq viżjoni tiegħu stess – li jagħmel il-mużika klassika aktar aċċessibbli. Fl-1987 waqqaf l-Johann Strauss Orchestra, li fil-bidu kienet tinkludi ftit mużiċisti biss iżda llum fiha aktar minn 50. Din l-orkestra saret sinonima mal-isem tiegħu u magħha Rieu vvjaġġa madwar id-dinja kollha.
Il-kunċerti tiegħu huma spettaklu sħiħ: mhux biss mużika klassika ta’ livell għoli, iżda wkoll atmosfera ta’ ferħ, kuluri, lbiesi eleganti u xeni teatrali. Il-valzers ta’ Johann Strauss huma l-qofol tal-programm tiegħu, iżda jdaħħal ukoll melodiji popolari li jħajru lill-udjenzi jkantaw u jżommu mal-ritmu.
Rieu biegħ miljuni ta’ CDs u DVDs, bosta drabi laħaq l-ewwel post fil-klassifiki tal-mużika klassika u crossover. Il-kunċerti tiegħu jiġbdu eluf ta’ spettaturi, b’mod speċjali fil-Vrijthof Square ta’ Maastricht, fejn kull sena jtellgħa spettaklu uniku li jiġbor turisti minn madwar id-dinja.
Lil hinn mill-mużika, Rieu jagħti importanza kbira lill-familja tiegħu. Huwa miżżewweġ lil Marjorie Rieu, li tmexxi wkoll parti mill-karriera tiegħu, u għandhom żewġ ulied, Pierre u Marc.
Matul il-karriera tiegħu kiseb għadd ta’ premjijiet u rikonoxximenti, fosthom diski tad-deheb u tal-platinu f’diversi pajjiżi. Huwa meqjus bħala wieħed mill-iktar artisti li rnexxielu jittrasforma l-mod kif in-nies jaraw il-mużika klassika: minn xi ħaġa riservata għal ftit, għal esperjenza popolari u emozzjonanti li tgħaqqad lill-udjenzi.
Illum, André Rieu jibqa’ jżomm post uniku fil-qasam mużikali. Il-messaġġ tiegħu hu ċar: il-mużika klassika għandha tkun għal kulħadd, tagħti ferħ u toħloq memorji li jdumu għal dejjem.
Fil-fatt kien hemm stennija kbira fost is-segwaċi tal-vjolinist ta’ fama dinjija, André Rieu għall-kunċerti li kellu jagħti fil-Fosos tal-Furjana fi tmiem il-ġimgħa li għaddiet. Il-vjolinist u direttur Olandiż magħruf mad-dinja kollha reġa’ ġie Malta, u mal-wasla tiegħu fl-ajruport internazzjonali ta’ Malta tkellem dwar il-ferħ tiegħu li jerġa’ jdoqq quddiem il-pubbliku Malti. Dan is-sit ħa l-kummenti tiegħu dwar l-esperjenza f’dawn l-avvenimenti tant sbieħ li seħħew.
Rieu qal li onestament jixxennaq ħafna għal dawn il-kunċerti, filwaqt li faħħar il-klima ta’ Malta u l-ospitalità tan-nies. Huwa stqarr li: “Il-lejl li għadda kien wieħed spettakolari. It-temp kien mill-isbaħ u kont qed nistenna bil-ħerqa li nerġa’ nqajjem il-mużika tiegħi f’din il-gżira sabiħa. Mistoqsi jekk jaħsibx li ‘l quddiem għad jiġi jirtira f’Malta, huwa kien pront wieġeb, “Jien mhu se nirtira qatt!”
Magħruf bħala r-Re tal-Waltz, André Rieu ilu snin twal iferraħ miljuni ta’ persuni bil-mużika tiegħu. Meta spjega s-sigriet tas-suċċess tiegħu, huwa rrimarka li: “Huwa sempliċi ħafna. Aħna nivvjaġġaw mad-dinja mhux biex nuru kemm aħna tajbin, iżda biex nagħtu l-ferħ lin-nies. Naturalment aħna mużiċisti tajbin, imma l-punt ewlieni hu li mmissu l-qlub ta’ dawk li jisimgħuna.”
Il-programm li pprepara għal Malta kien maħsub apposta għall-gosti tal-Maltin. Rieu tenna li: “Ħadt gost nara lin-nies ikantaw, jiżfnu u jipparteċipaw fil-programm li ħejjejtilhom. Appunti kienet serata mimlija mużika għaż-żfin, magħmula speċjalment għal Malta.”
Qabel il-wasla tiegħu ġurnata qabel, inġabru fl-ajruport għadd ta’ partitarji, xi wħud anke minn barra minn Malta, biex jilqgħuh, jieħdu ritratt miegħu jew jitolbuh firma. Fosthom kien hemm mara mill-Iskozja li rrakkuntat li kienet diġà attendiet għal diversi kunċerti tiegħu, inkluż l-aħħar darba li kien f’Malta sentejn ilu, u għalhekk kienet irritornat apposta.
L-entużjażmu kbir għall-prestazzjonijiet tiegħu jibqa’ jispikka kullimkien. Rieu, personalità dejjem ferriħija u mimlija kariżma, għandu l-abbiltà jattira eluf kbar ta’ segwaċi lejn kunċerti tiegħu mimlija ħajja. Il-mużika tiegħu tħaddan mhux biss valzi popolari u klassiċi, iżda wkoll melodiji folk u kanzunetti magħrufa mad-dinja kollha, b’taħlita li tolqot kull ġenerazzjoni.
Filwaqt li rrakkonta bosta memorji, Rieu semma wkoll id-dar tiegħu fil-kastell “De Torentjes” f’Maastricht, fejn trabba u għadu jgħix. Huwa spjega bi tbissima nostalġika: “Meta kont żgħir kont inħobb naqra l-komiks ta’ Tintin. F’wieħed mill-episodji rajt stampa ta’ kastell, u minn dak il-ħin bqajt noħlom li xi darba jkolli kastell tiegħi. Illum din il-ħolma saret realtà.”
Il-kunċerti tiegħu dejjem ikunu spettaklu sħiħ, fejn il-vjolinist jiġi akkumpanjat minn orkestra mdaqqsa ta’ madwar sittin mużiċist, flimkien ma’ żeffiena u mistiedna speċjali. Fost dawk li ħadu sehem kien hemm sopranos, tenuri, ir-rebbieħa tal-edizzjoni Olandiża ta’ The Voice Kids u anke l-grupp Los Rios, magħruf għall-kanzunetta Macarena.
Wieħed mit-tim tiegħu, The Platin Tenors, irrimarka: “Ilna għoxrin sena naħdmu ma’ André. S’issa għamilna kważi sitt mitt spettaklu flimkien, u kull wieħed minnhom jibqa’ memorja speċjali.”
Kulħadd faħħar il-ħila ta’ Rieu li jagħżel il-mużika xierqa għal kull pubbliku: “André għandu sens mużikali perfett. Dejjem jaf liema biċċiet ta’ mużika jistgħu jolqtu lin-nies, mhux biss bil-ferħ iżda wkoll bl-emozzjonijiet l-aktar profondi.”
Il-kunċerti ta’ Rieu huma magħrufa wkoll għall-ġmiel tal-kostumi, maħduma minn stilista rinomata, Gosia Tarnowski, li spjegat li l-ispirazzjoni tagħha ġejja minn novelli u leġġendi sbieħ. Ilbiesi sbieħ, disinji mill-isbaħ, kollha magħmula apposta biex jagħtu kulur u eleganza lil dawn is-serati mużikali.
Barra minn hekk, l-entourage tiegħu jiġi dejjem akkumpanjat mill-kok personali tiegħu, Frank Neitzel, li jipprepara kuljum ikel frisk u varjat għat-tim.
Il-kunċerti ta’ André Rieu f’Malta saru propju l-Ġimgħa u s-Sibt fil-Fosos tal-Furjana, fejn eluf ta’ partitarji gawdew spettaklu mimli mużika, emozzjonijiet u ferħ.