Fl-aħħar jiem il-Pakistan esperjenza kriżi bl-impatti naturali kbar li qed iħallu l-għargħar qawwija li laqtu lil dan il-pajjiż. B’rabta ma’ dawn l-iżviluppi li qed iseħħu, il-Ministeru għall-Intern, is-Sigurtà, ir-Riformi u l-Ugwaljanza se jkun qed jibgħat għajnuna umanitarja lill-poplu tal-Pakistan permezz tal-Protezzjoni Ċivili.
Inbeda għalhekk il-proċess li jintuża mid-Dipartiment tal-Protezzjoni Ċivili li bih pajjiżna jassisti pajjiżi barranin li jkollhom bżonn ta’ għajnuna umanitarja urġenti.
Il-Ministru għall-Intern, is-Sigurtà, ir-Riformi u l-Ugwaljanza Byron Camilleri spjega li għal darba oħra, Malta se tkun qed toffri għajnuniet umanitarji urġenti lil popli ta’ pajjiżi oħra li jkunu għaddejjin minn ċirkostanzi diffiċli.
“Id-Dipartiment tal-Protezzjoni Ċivili qed jerġa’ jkun fuq quddiem fil-koordinament ta’ din it-tip ta’ għajnuna lil pajjiżi oħra. Bis-saħħa ta’ din il-ħidma, pajjiżna se jingħaqad ma’ ħafna stati membri tal-Unjoni Ewropea oħra li qed jibagħtu l-għajnuniet lill-Pakistan f’dan il-mument diffiċli”, qal il-Ministru Camilleri.
