Minn Kayne Said, Maniġer għal Komunikazzjoni – Fondazzjoni Logħob Responsabbli – [email protected]
Il-kwistjoni tar-reklamar eċċessiv tal-logħob tal-azzard ilha żmien twil suġġett ta’ dibattitu f’diversi pajjiżi, inkluż Malta. Ħafna jqisu r-reklamar bħala għajn ewlenija li tħeġġeġ lin-nies biex jilagħbu, u għalhekk jappoġġjaw projbizzjoni totali. Madankollu, tali projbizzjoni mhix realistika u, fil-fatt, tista’ twassal għal aktar problemi milli soluzzjonijiet. Il-verità hi li għandna bżonn approċċ aktar regolatorju u bilanċjat li jħares lill-konsumatur u fl-istess ħin iħalli spazju għal industrija li taħdem b’mod trasparenti u leġittimu.
L-ewwel argument kontra projbizzjoni sħiħa hu li din tista’ timbotta lill-ġukaturi lejn is-suq illegali. Meta s-suq legali jillimita drastikament il-viżibilità tiegħu, l-operaturi bla liċenzja jieħdu vantaġġ minn dan il-vojt. Il-konsumaturi jistgħu jispiċċaw jilagħbu ma’ kumpaniji li mhumiex soġġetti għal ebda forma ta’ moniteraġġ jew regolamentazzjoni. Dan ifisser li ma jkun hemm l-ebda protezzjoni kontra abbużi, l-ebda miżuri ta’ logħob responsabbli u l-ebda sigurtà fir-rigward ta’ ħlasijiet jew qligħ.
F’dan il-kuntest, projbizzjoni ma tnaqqasx il-problemi, iżda sempliċiment tittrasferihom f’ambjent aktar perikoluż u moħbi, fejn il-ġukaturi jibqgħu kompletament vulnerabbli.
Ħafna jaraw ir-reklamar bħala mezz ta’ promozzjoni biss, iżda fir-realtà jista’ jkun ukoll strument ta’ edukazzjoni. Reklamar irregolat u responsabbli jista’ jinkludi messaġġi ta’ twissija dwar ir-riskji tal-logħob, tfakkiriet biex jitqiegħdu limiti personali u informazzjoni dwar għajnuna disponibbli għal min iħoss li tilef il-kontroll. Din l-informazzjoni tgħin lill-ġukaturi jagħmlu għażliet infurmati u konxji, u b’hekk ir-reklamar isir parti minn kultura ta’ prevenzjoni u mhux ta’ inkoraġġiment bla rażan.
Pajjiżi li ppruvaw projbizzjoni totali ma rnexxilhomx jiksbu r-riżultati mixtieqa. Fil-fatt, ħafna minnhom irrevedew il-liġijiet tagħhom u reġgħu daħlu sistema ta’ regolamentazzjoni.
Min-naħa l-oħra, pajjiżi li addottaw qafas aktar intelliġenti, bħal pereżempju li jillimitaw il-ħinijiet ta’ reklamar jew jintroduċu projbizzjonijiet fuq reklamar immirat lejn minuri u persuni vulnerabbli, sabu bilanċ aktar sostenibbli.
Sistema regolata tista’ tinkludi numru ta’ miżuri effettivi:
– Limitazzjonijiet fuq il-ħinijiet u l-ispazji ta’ reklamar;
– Kontenut obbligatorju dwar logħob responsabbli;
– Moniteraġġ kontinwu minn awtoritajiet indipendenti, u
– Sanzjonijiet ċari kontra min jikser ir-regoli.
Dawn il-passi jassiguraw li r-reklamar isir b’mod responsabbli u li l-industrija tibqa’ taħdem f’ambjent legali u sikur, mingħajr ma timbotta lill-konsumaturi lejn l-operaturi illegali.