Dan il-weekend li għadda mmarka s-7 rawnd tat-tazza ROK tal-Italja fil-Franciacorta Karting Track għax-xufier tal-go karts Ayrton Jon Tonna.
Għal Tonna kollox beda l-Ġimgħa, fejn iffoka fuq is-setup tax-chassis. Imbagħad l-għada, jiġifieri is-Sibt iltaqa’ ma’ diversi sfidi, fosthom il-fatt li l-ewwel żewġ sessjonijiet saru f’xita qawwija, segwiti minn kundizzjonijiet niexfa u xemxin għall-bqija tal-ġurnata.
Eventwalment il-Ħadd, ix-xufier Ayrton kklassifika fl-14-il post minn 18. Madankollu, fil-kwalifikazzjoni, irnexxielu jagħmel ħin kompetittiv li poġġieh fit-3 post fil-grupp tiegħu. Sfortunatament, minħabba penality kawża ta’ bumper, l-aqwa dawra tiegħu ġiet invalidata, u ħallietu mingħajr ħin ta’ kwalifikazzjoni.
B’riżultat ta’ dan, beda it-tiġrija fit-23 post minn fost 25 xufiera. Fil-Manche 1, kiseb diversi pożizzjonijiet u spiċċa fid-19 -il post. Fil-Manche 2, żamm il-pożizzjoni u spiċċajt 17 -il post.
Ikkwalifika fis-27 post minn 36 xufier għall-finali. Wara bidu qawwi, tela’ għall-14 -il post sat-tieni dawra, iżda problema bil-magna fir-raba’ dawra ġegħlitni niżżel fil-klassifika, u qsamt il-linja finali fil-P23.
F’messaġġ fuq Facebook, ix-xufier Ayrton qal; “Għalkemm dan il-weekend ma marx kif ippjanat, il-motorsport jgħallmek li dan huwa vjaġġ mimli tlajja u nżul. Kull tellieqa hija esperjenza ta’ tagħlim u parti mill-vjaġġ. Inħares ‘il quddiem lejn it-8 u l-aħħar rawnd f’Settembru”