Minn Cristian Muscat
Kif bdiet l-imħabba tiegħek lejn il-futbol?
L-imħabba tiegħi ghall-isport, u iktar partikolari għall-futbol, nista’ ngħid li twelidt biha. Il-ġenituri tiegħi jgħiduli li minn mindu kont żgħir, qatt ma qbadt karozzi jew ġugarelli oħra biex nilgħab ħlief ballun minn dejjem. Dan jista’ jkun ħadtu min-DNA ta’ missieri għax minn dejjem kien sportiv fejn kien jilgħab il-basketball.
Iddeskrivi l-esperjenza preżenti tiegħek ma’ St George’s FC.
Ma St. George’s FC qed tkun esperjenza sabiħa u pożittiva. L-isbaħ ħaġa li għandna hija l-għaqda u l-armonija fil-grupp, kemm bejnietna il-plejers kif ukoll mal-istaff tekniku u kumitat. Fejn hemm l-għaqda, hemm is-saħħa u dan qed jagħtina il-frott din is-sena.
Iddeskrivi r-rwol tiegħek bħala viċi-captain ta’ dan it-tim.
Bħala viċi-captain m’għandiex rwol partikolari. Bħala grupp ta’ plejers, qegħdin taħlita bilanċjata ta’ plejers żgħar fl-etá mimlija enerġija u bil-motivazzjoni li jitgħallmu, u grupp ta’ plejers b’daqsxejn iktar esperjenza. Bħala plejer ta’ iktar esperjenza fit-tim, jien nagħmel l-almu tiegħi kollu biex nagħti eżempju siewi lil sħabi l-plejers, kif ukoll ngħin u niggwida lill- plejers żgħar biex jimmassimizaw il-potenzjal tagħhom, ħalli għada pit’għada meta nirtira jien inkun nista’ nkompli nara lilhom jilagħbu.
X’tikkummenta fuq l-andament tat-tim matul l-istaġun li għadda?
Ifhimni, bħala staġun kien wieħed kemmxejn imħallat. Kien wieħed pożittiv fejn irnexxielna nidħlu fil-Play-Offs, u wisq iktar pożittiv għax irnexxielna nagħqdu grupp ta’ plejers imħallta bejn esperjenza u energija ta’ diversi żgħażagħ promettenti, li sal-aħħar tal-istaġun tista’ tgħid spiccajna qisna tieni familja ta’ xulxin, li ħafna minn dawn se jinżammu bħala n-nukleu għall-istaġun li ġej.
Kien wieħed diżappuntanti għaliex ma lħaqniex l-għan tal-promozzjoni, minħabba diversi raġunijiet varji.
Kollox ma’ kollox, kien kampjonat sabiħ. Nawgura lil Victoria Hotspurs FC tal-promozzjoni li kisbu bħala champions u d-dominju li kellhom fl-Ameteur League 2 bir-rebħ tad-double, kif ukoll lil Mqabba FC għall-promozzjoni li humw wkoll kisbu.
Ħadt gost nara diversi plejers ta’ esperjenza għadhom jilagħbu jgħinu lill-plejers żgħażagħ, kif ukoll ninsab ottimist biex nara diversi plejers żgħażagħ jibqgħu jiżvillupaw fil-logħba tal-futbol.
Kif tqis il-livell tan-National Amateur League 2 fil-preżent?
Il-livell huwa wieħed tajjeb. Il-moviment ta’ diversi plejers f’dawn id-diviżjonijiet iktar baxxi qed iservi ta’ ġid biex il-livell ikompli jogħla, u anke l-introduzzjoni ta’ diversi żgħażagħ b’potenzjal tajjeb qed jgħin ukoll.
Għaddi messaġġ finali lil min jixtieq jagħmel karriera ta’ suċċess fil-futbol.
Kif ngħid lit-tfal fl-iskejjel, l-ewwel u qabel kollox għandek tipprattika kwalunkwe sport b’imħabba u passjoni. Meta tagħmel xi ħaġa mill-qalb, tħoss sodisfazjon akbar ġewwa fik u dan iservi ta’ motivazzjoni sħiħa biex iwasslek tegħleb ostakli kbar u tilħaq poteznjal li jaqtagħlek ix-xewqat li jkollok. Ovvjament, dan kollu dejjem b’umiltá u sagrifiċċju!
