Ix-xogħol tal-idejn li fih wieħed jagħmel il-pastizzi tradizzjonali Maltin tal-piżelli u tal-irkotta hija arti li fiha wieħed irid ikun kreattiv. L-istorja tal-pastizzi hija interessanti ferm u dwar dan tkellimna ma’ sid il-kumpanija “Sphinx”, Elvin Muscat, magħruf aktar bħala Vinu.
Dan il-missier ta’ tlett itfal f’intervista spjega li l-pastizzi tradizzjonali tagħna ilhom ġejjin fl-Istorja minn żmien in-Normanni u dejjem evolvew. “Fi żmien in-Normanni kienet inħolqot il-filo pastry fejn kien hemm nies li ħolqu ċertu kultura ta’ ikel. Fosthom għandna l-imqaret li l-isem proprja huwa maqrut (ifisser djamant bl-Għarbi) u l-bombolin li narawhom fid-donuts taz-zokkor. Dawn huma kollha rikreazzjonijiet li ġew fix-xtut Maltin u għandna nibżgħu għalihom. Ħafna nies jgħiduli li l-pastizzi ġew minn Sqallija bl-isfogliatella imma, il-pastizzi ġew aktar mill-pajjiżi Għarab milli dawk Ewropej. Aħna l-Maltin konna taħt kolonja Għarbija u anke l-Isqallin. Ma ninsewx li Malta kienet f’nofs in-negozju fil-Mediterran u dejjem innegozjajna fl-ikel. B’hekk ġew Malta,” spjegalna Vinu.
Sengħa mimlija passjoni meqjusa bħala arti
Dan ix-xogħol tradizzjonali tal-idejn għal Vinu huwa passjoni, sengħa u arti li jixtieq li bħala poplu, nibżgħu għalih. Din is-sena l-kumpanija Sphinx tagħlaq 30 sena mit-twaqqif tagħha u hija sena importanti ħafna hekk kif se joħroġu elementi ġodda b’inizjattivi, attivitajiet u kollaborazzjoni ma’ negozji lokali, refurbishment, bidla fil-logos u anke menu ġdid.
Filwaqt li bi tbissima qalilna li “t-turist jixtri pastizz wieħed u jaqsmu mentri l-Malti jixtrilek tużżana u jiekolhom fil-karozza”, Vinu nsista li huwa proprju għalhekk li għandna napprezzaw dak li għandna. “Għax il-Malti huwa sabiħ. Kemm ingergru imma kulħadd hawn jibqa’. Iddur kemm iddur id-dinja ma ssibx isbaħ minn hawn. Hemm min ma jafx kemm tfisser Malta u kemm għandha x’toffri aktar. Biex tapprezza kemm taqbad dgħajsa u ddur ma’ Malta. Ukoll tiġġennen. Kull barrani li jiġi jibqa’ mistgħaġeb imma aħna ma narawhiex għax drajna. Dan bħal meta aħna mmorru barra u naraw post għall-ewwel darba. Bit-tajjeb u l-ħażin tagħna, traffiku, ġlied, baħar, pastizzi li jħaxxnu, dawn huma fost il-karatteristiċi tagħna li jagħmluna Maltin. Irridu napprezzaw dak li għandna”.
Għal intervista sħiħa ara IT-TORĊA ta’ għada
