Fil-ġurnata ta’ qabel tal-aħħar tal-għawm fl-ilma miftuħ li huwa parti mill-Kampjonati tad-Dinja tal-Għawm li qed isiru fl-Ungerija, it-Taljan Gregorio Paltrinieri għaqqad is-sett ta’ midalji meta rebaħ id-deheb fl-10km.
It-tellieqa femminili marret għand l-Olandiża, Sharon van Rouwendaal li għaliha hija l-ewwel midalja tad-deheb li rebħet f’Lupa Lake din is-sena.
Wara li rebaħ midalja tal-bronż fir-relay ta’ 6km, Paltrinieri żied it-tieni waħda meta rebaħ il-fidda fil-5km. U biex jgħaqqad is-sett ta’ tliet kuluri ta’ midalji, ilbieraħ rebaħ l-10km meta spiċċa fil-ħin ta’ kważi sagħtejn, 1:50:56.8.
Il-kollega tiegħu, Domenico Acerenza, għamilhom 1-2 għall-Italja meta ħa l-fidda f’1:50:58.2 waqt li l-Ġermaniż Florian Wellbrock kellu jikkuntenta bil-midalja tal-bronż meta daħal fil-ħin ta’ 1:51:11.2. Wellbrock issa rebaħ tnejn tad-deheb u waħda tal-bronż.
Min-naħa ta’ Rouwendaal hija rebħet it-tellieqa tagħha tal-10km meta temmet fil-ħin ta’ 2:02:29.2 f’dik li kienet taqtiegħa mill-aktar drammatika tant li l-Ġermaniża, Leonie Beck, li spiċċat fil-ħin ta’ 2:02:29.7 … li huwa 0.5 ta’ sekonda.
Il-midalja tal-bronż ħaditha l-Brażiljana, Ana Marcia Cunha, li spiċċat fil-ħin ta’ 2:02:30.7 u bħalma kien il-każ fit-tellieqa tal-irġiel hija ħadet il-bronż bħal Wellbrock wara li t-tnejn rebħu l-5km.
IĊ-ĊINIŻI JIDDOMINAW
L-atleti Ċiniżi komplew jiddominaw fid-dixxiplina tal-qbiż meta s’issa rebħu l-ħames avvenimenti li saru. Huma għamluhom 1-2 fit-3m springboard irġiel meta Wang Zongyuan kiseb 561.95 punti. Cao Yuan ħa l-fidda b’492.85 punti u l-Britanniku Jack Laugher kiseb il-fidda b’total ta’ 473.30 punti.
Fl-10m platform sinkronizzat kienu ċ-Ċiniżi Cao Yuan u Wang Zongyuan li ħadu d-deheb b’459.18 punti, il-Britanniċi Anthony Harding u Matty Lee l-fidda b’427.71 punti u l-Kanadiżi Rylan Wiens u Nathan Zsombor-Murray il-bronż b’417.12 punti.
Fl-avveniment tat-Timijiet Imħallta kienu ċ-Ċiniżi, Quan Hongchan u Bai Yuming li rebħu d-deheb bi 391.40 punti, il-fidda ħaduha l-Franċiżi Jade Gillet u Alexis Jandard bi 358.50 u l-bronż marret għand il-Britanniċi, Andrea Spendolini Serieix u James Heatly, bi 357.60 punti.
