Għaxaq Wolves fetħu vantaġġ ta’ seba’ punti f’ras il-klassifika tal-kampjonat tal-Ewwel Diviżjoni tal-MAFA wara li għelbu lil Senglea Gunners 2-1.
Għaxaq Wolves – Senglea Gunners 2-1
Kienet logħba ferm bilanċjata biż-żewġ timijiet li ssieltu kemm felħu sabiex jieħdu t-tliet punti finali.
Għaxaq marru minn fuq fit-28 minuta wara li Sebastian Nayar skorja minn freekick ferm sabiħ li bih għeleb lill-goalkeeper ta’ Senglea Bitseki.
Fit-tieni taqsima, Senglea ħarġu tajjeb u fl-54 minuta ġabu l-iskor indaqs hekk kif Moises Chijoke Nwankwo daħal tajjeb fil-kaxxa u b’xutt b’saħħtu għeleb lil Lionel Martin bejn il-lasti Għaxqin.
Għaxaq skorjaw il-gowl li bih kisbu r-rebħa minn penalty wara li Stanimir Miloskovic twaqqa’ fil-kaxxa minn difensur ta’ Senglea bir-referee jindika d-disk tal-penalty. Il-plejers Sengleani pprotestaw bl-aħrax għal din id-deċiżjoni. Mill-11-il metru, kien Sebastian Nayar li għeleb lil Bitseki għat-tieni darba sabiex ta t-tliet punti drammatiċi għat-tim tiegħu.
Referee kien Darko Stankovic.
Marsa St Michael – San Ġiljan Saints 1-0
Gowl skorjat minn Ayoubah Fona minuta minn tmiem il-partita ta rebħa importanti ħafna għal Marsa St Michael fuq San Ġiljan Saints.
Din ir-rebħa issa poġġiet lill-Marsin fit-tieni post tal-klassifika hekk kif għandhom ukoll logħba nieqsa.
Referee kien Jean Pierre Sammut.
Valletta St Paul’s – San Ġwann Pro Evolution Academy 3-0
Valletta St Paul’s ġejjin f’tagħhom hekk kif għelbu lil San Ġwann Pro Evolution Academy 3-0.
Sa tmiem l-ewwel taqsima, il-Beltin kienu qed jirbħu 1-0 sabiex fit-tieni taqsima huma żiedu tnejn oħra u rreġistraw il-ħames rebħa staġjonali.
Nika Glonti poġġa lis-St Paul’s minn fuq fl-10 minuta sabiex fit-tieni taqsima, Luka Asanideze fil-41 minuta u Juan Esteban Ortega Zarate żied ieħor minn penalty fl-aħħar minuta tal-logħba.
Referee kien Roderick Micallef.
It-Tieni Diviżjoni
Birżebbuġa St Peter’s AFC – Ta’ Ġiorni Wanderers 8-0
Birżebbuġia St Peter’s AFC kisbu t-tielet rebħa konsekuttiva fit-tieni round wara li ddominaw kompletament lil Ta’ Ġiorni Wanderers u rebħulhom 8-0.
Protagonista ewlieni tal-logħba kien l-aqwa skorer tal-kampjonat Oussama Boutayeb li skorja tripletta. Joshua Farrugia, Titi Dumitru, Jeremy Grixti, Ronnie Celeste u Karim Salman għaqqdu r-riżultat għat-tim min-naħa t’isfel ta’ Malta.
Referee kien Gordon Barbara.
Swieqi United AFC vs Gudja Wanderers 7-0
Skor ieħor kbir kien reġistrat minn Swieqi United AFC li għelbu lil Gudja Wanderers 7-0.
Philippe Gla Henri u Mohandas Kolathiparambil skorjaw doppjetta kull wieħed filwaqt li Terrance Glen Dominicus, Suhail Manthrammal u Sobral Dos Santos Leonardo aċċertaw l-ewwel rebħa tat-tieni round għal Swieqi.
Referee kien Miguel Francica
Attard Edex Kings – Mqabba Albions 6-2
Anke Attard Edex Kings kisbu l-ewwel rebħa tat-tieni round wara skor ta’ 6-2 kontra Mqabba Albions.
Lucas Carvalho skorja hat-trick filwaqt li Felix Roberty kien awtur ta’ doppjetta. Abishek Paraparampil żied ieħor għal Attard.
Ersi Balliu u Hagy Semu Maher kienu l-awturi tal-gowls ta’ Mqabba.
Referee kien Jean Pierre Mifsud.
KLASSIFIKA L-EWWEL DIVIŻJONI
Għaxaq Wolves – 26, Marsa St Michael – 19, Senglea Gunners – 17, alletta St Paul’s – 17, Valletta Stars – 15, San Ġiljan Saints – 10, San Ġwann Pro Ev – 9, Balluta Barracudas – 3.
KLASSIFIKA IT-TIENI DIVIŻJONI
Birżebbuġa SP AFC – 9, Ħamrun Sporting – 6, Attard Edex Kings – 4, Swieqi United AFC – 4, Naxxar Victorians – 3, Gudja Wanderers – 2, Mqabba Albions – 1, Ta’ Ġiorni W – 1.