Xejn inqas minn 180 sena wara l-istatus mogħti mir-Reġina Vittorja, Ġibiltà tista’ uffiċjalment tissejjaħ bħala Belt.
It-territorju Ingliż barra mill-pajjiż kien offra biex isir belt aktar kmieni din is-sena bħala parti miċ-ċelebrazzjonijiet b’rabta mas-70 sena tar-Reġina Eliżabbetta fuq it-tron. Iżda meta r-riċerkaturi fittxew fl-Arkivji Nazzjonali, sabu li din diġà kienet ingħatat dan ir-rikonoxximent fl-1842. Wara tant snin, dan it-titlu ġie affermat mill-ġdid.
Ġibiltà ilha Territorju Brittaniku extra-Ewropew mill-1713, meta ġiet ċeduta lill-Gran Brittanja taħt trattat ta’ paċi ffirmat wara l-Gwerra tas-Suċċessjoni Spanjola.
Kompetizzjoni li saret fl-okkażjoni tal-Ġublew rat 39 post japplikaw biex isiru bliet u tmienja minnhom, inklużi Doncaster, Bangor, u Dunfermline, ingħataw it-titlu. Dan it-titlu ħafna drabi huwa assoċjat mal-fatt li jkollok katidral, università jew popolazzjoni kbira, iżda m’hemm l-ebda regoli stabbiliti biex jingħata. Fl-aħħar mill-aħħar huwa titlu li jingħata mill-monarka fuq parir tal-ministri. Dan it-titlu ftit iġib miegħu benefiċċji materjali għalkemm ħafna drabi jista’ jgħin biex jagħti spinta lill-komunitajiet biex isibu posthom fuq il-mappa tad-destinazzjonijiet li dak li jkun għandu jżur u dan jofri ċertu sens ta’ kburija lir-residenti.
Il-gvern qal li Ġibiltà tħalliet barra mil-listi uffiċjali wara li oriġinarjament ingħatat it-titlu mir-Reġina Vittorja, iżda mhux ċar kif seħħ dan.
