L-aġent ta’ Giorgio Chiellini, Davide Lippi, jirrifjuta li jeskludi ċaqliq possibbli għall-Major League Soccer għall-captain ta’ Juventus iżda mhuwiex ċert li Kylian Mbappe jingħaqadx ma’ Real Madrid.
Il-kuntratt ta’ Chiellini f’Turin jiskadi f’Ġunju 2023, iżda skond diversi rapporti fl-Italja, jista’ jew jirtira fi tmiem dan l-istaġun jew jilgħab għal sena oħra fl-MLS.
L-aġent tiegħu Davide Lippi, iben il-coach Taljan rebbieħ tat-Tazza tad-Dinja, Marcello, irrifjuta li jeskludi li jmur jilgħab fl-Amerika għad-difensur veteran li kien jibqa’ Turin sa tmiem il-kuntratt tiegħu li kieku l-Italja kkwalifikat għall-finali tat-Tazza tad-Dinja 2022.
“Għadu kmieni biex jitkellem dwar il-futur tiegħu, Chiellini huwa ffukat fuq Juventus u jaħseb biss biex itemm l-istaġun tajjeb,” qal Lippi lill-media Taljana.
“MLS? Qed nitkellmu fuq atleta magħruf mad-dinja kollha. Ma nafx fejn jista’ imur, iżda mhux se jonqsu l-offerti. Jeħtieġ iż-żmien u l-paċenzja biex jittieħdu deċiżjonijiet ma’ dawn il-kwalitá ta’ players.”
Paulo Dybala żgur se jinfired minn Juventus, li ddeċidew li ma jestendux il-kuntratt li se jiskadi. Għalhekk, l-Arġentin se jħalli lill-club bħala aġent ħieles fis-sajf.
“Nispera li jibqa’ l-Italja,” qal Lippi.
“Huwa emozzjona ruħu fl-aħħar partita ma’ Cagliari u dan jgħid ħafna dwar ir-rabta tiegħu ma’ Juventus. Nittama li ma jmurx jilgħab barra l-pajjiż, iżda nibża’ li dan se jiġri.”
Minkejja li mhuwiex l-aġent ta’ Dybala jew ta’ Mbappe, Lippi kien mistoqsi wkoll dwar il-futur tal-istilla Franċiż li allegatament diġá ħa b’idejn Real Madrid dwar ftehim ġdid ta’ €50 miljun fl-Estadio Bernabeu.
“Ma nafx x’se jiġri, rajt xi ħaġa differenti dan l-aħħar, għalhekk m’inix ċert li se jħalli lill-Pariġini,” temm jgħid l-aġent Taljan.
RINCON F’QAGĦDA KRITIKA – L-eks captain tal- Kolombja, Freddy Rincon, 55 sena, jinsab f’qagħda kritika bi ġrieħi gravi f’rasu wara li kien involut f’ħabta bil-karozza f’Cali. Huwa kien qed isuq karozza li fiha kien hemm erba’ persuni oħra meta din kienet involuta f’ħabta ma’ karozza tal-linja kmieni nhar it-Tnejn. Il-passiġġieri kollha fil-karozza weġġgħu, kif ukoll ix-xufier tal-linja.
L-ex midfielder ta’ Real Madrid skorja 17-il goal għall- Kolombja u lagħab fi tliet Tazzi tad-Dinja.
Huwa lagħab ukoll ma’ Napoli, Palmeiras u Santos, kif ukoll mexxa lil Corinthians fl-2000 għar-rebħa fl-ewwel Kampjonat tad-Dinja tal-Clubs tal-FIFA, illum t-Tazza tad-Dinja tal-Clubs.