Giovanni Tedesco huwa l-coach il-ġdid ta’ Santa Lucia.
Il-club mill-Kampjonat Premier kien qed ifittex coach ġdid wara li aktar kmieni dan ix-xahar is-Saints kienu neħħew lil Oliver Spiteri.
Taħditiet bejn il-president tal-club Robert Micallef u Tedesco bdew il-ġimgħa li għaddiet u fl-aħħar intlaħaq ftehim nhar l-Erbgħa.
Fil-fatt, Tedesco qabel li jiffirma kuntratt sa tmiem l-istaġun.
Il-coach Taljan mill-ewwel beda l-ħidma tiegħu fil-club meta l-Erbgħa filgħaxija mexxa l-ewwel sessjoni ta’ taħriġ tiegħu.
Tedesco mistenni jiddebutta nhar is-Sibt meta Santa Lucia jiltaqgħu mal-leaders tal-Kampjonat Premier, Hibernians, fit-Tony Bezzina Stadium.