GO qed tiċċelebra ċifri ta’ suċċess fi tmiem l-ewwel skeda tal-istazzjon televiżiv tagħha TOKIS li beda jxandar uffiċjalment għall-ewwel darba fit-30 ta’ Settembru 2022.
“Hekk kif bdejna nxandru TOKIS, GO kienet diġà rreġistrat ‘il fuq minn 1.7 miljun views għall-kontenut li kien disponibbli bħala video on demand. Minn dakinhar ‘l hawn, bis-seba’ produzzjonijiet tagħha, li b’mod kollettiv kellhom iżjed minn 5000 siegħa ta’ kontenut x’joffru, GO kienet qed tirreġistra medja ta’ madwar 155,000 views kuljum. Illum, din l-udjenza qabżet l-4 miljun view. Dan wassal biex TOKIS huwa fost l-erba’ stazzjonijiet l-aktar imfittxija f’Malta. L-istazzjon tagħna qed jopera 24 siegħa kuljum,” ħabbret Alison Mercieca, Senior Marketing Manager ta’ GO.
GO kienet introduċiet TOKIS, librerija esklussiva dedikata kollha kemm hi għal kontenut ta’ televiżjoni Malti biex twassal iżjed valur lill-klijenti tagħha,. U biex tkompli ssaħħaħ l-esperjenza tal-klijenti, GO investiet €1 miljun billi kkummissjonat 1000 siegħa ta’ produzzjonijiet ta’ drama bil-Malti esklussivament għall-klijenti ta’ GO TV. Dan l-investiment sostanzjali juri l-fiduċja li GO għandha fit-talent lokali u l-impenn tagħha li xxandar l-istejjer li Malta għandha x’toffri.
“TOKIS mistenni jitniżżel bħala pass sinifikanti fl-evoluzzjoni tal-istorja tat-televiżjoni ta’ Malta grazzi għall-varjetà ta’ kontenut li jappella għal nies ta’ kull età, b’interessi differenti,” żiedet tgħid is-Sa. Mercieca.
Hija spjegat ukoll kif GO bdiet il-vjaġġ tagħha fil-qasam tat-televiżjoni fl-2007 meta bdiet tiffoka fuq it-teknoloġija, il-pjattaforma u l-user interface tagħha. Eventwalment, GO fehmet li biex tipprovdi l-esperjenza sħiħa li l-konsumaturi kienu qed jistennew kellha tara kif twassal il-kontenut li jħobbu l-iżjed.
“Il-ħolqien ta’ TOKIS ma kienx ibbażat biss fuq l-istatistika li baqgħet turina kemm il-Maltin qed ifittxu kontenut lokali, speċjalment produzzjonijiet ta’ drama. Il-produzzjoni ta’ kontenut Malti ta’ kwalità għolja kienet importanti ħafna għalina wkoll u kien għalhekk li ddeċidejna li ninvestu €1 miljun sabiex l-industrija tal-films lokali tipproduċi kontenut ġdid u iżjed rikk. Is-suċċess li bdejna naraw wassal biex GO tkabbar dan l-investiment għal €3 miljuni fuq tliet snin.”
“Inħossuna partikolarment kburin bil-fatt li filwaqt li stazzjonijiet oħra wrew ħafna kontenut barrani, TOKIS ipprovda kontenut tajjeb, oriġinali u ta’ kwalità għolja bil-lingwa Maltija,” żied jgħid Antonio Ivankovic, il-Kap Kummerċjali ta’ GO.
“Nittamaw li l-komunità lokali tapprezza li dan huwa l-mod tagħna biex nippromwovu t-talent Malti u ngħinu lill-pajjiż iħares il-wirt, il-kultura u iżjed importanti, l-ilsien tiegħu.”
Is-Sur Ivankovic ħabbar li TOKIS se jkompli jwassal kontenut li t-telespettaturi ta’ GO ilhom isegwu u jgawdu matul dawn l-aħħar xhur.
“TOKIS għenna nifhmu dak li jridu jaraw il-klijenti tagħna, u dan irridu nkomplu nwettquh. Fil-fatt, minbarra investiment kontinwu fid-drama Maltija, qed nippjanaw ukoll kontenut ġdid li jirrifletti l-preferenzi u l-aspettattivi tal-klijenti. Fl-iskeda li jmiss li tibda f’Settembru, qed nippjanaw li nintroduċu programm ta’ diskussjoni, kif ukoll produzzjoni ta’ divertiment bl-involviment ta’ artisti tal-mużika lokali,” ħabbar is-Sur Ivankovic.
Minn Settembru, it-telespettaturi se jibdew igawdu l-ispettaklu mużikali eċċitanti ‘Boomers’, fejn kantanti veterani Maltin se juru t-talent tagħhom bl-interpretazzjoni ta’ kanzunetti kontemporanji. U għal dawk li jħobbu d-drama ispirata mis-CSI, is-sensiela ‘Persuni Rapurtati Nieqsa’ se tkun qed issegwi tim ta’ investigaturi dedikati li jsolvu każijiet kumplessi. It-telespettaturi se jkunu jistgħu wkoll jidħlu f’diskussjonijiet li jqanqlu l-ħsieb mal-udjenza fuq ‘Il-Każin’, talk show konvinċenti mmexxi minn Jon Mallia. U għal dawk li qed ifittxu serje ta’ drama ħafifa iżda intensa, għandhom ikunu ħerqana għall-produzzjoni ‘Il-President’ – bl-idea li figura kontroversjali u mhux konvenzjonali tintagħżel sabiex tokkupa l-ogħla kariga tal-pajjiż – b’Peppi Azzopardi bħala l-President ta’ Malta.
Minbarra dawn il-produzzjonijiet ġodda, TOKIS se jkompli juri t-tieni staġun ta’ Mejta biex Ngħix, Spettur Leonard u Luna, it-tielet staġun ta’ Noli u l-ħames staġun ta’ Ċaqqufa.
“GO, tibqa’ impenjata li twassal aktar valur miżjud lill-klijenti leali tagħna u għalhekk se nibqgħu ninvestu fl-offerta tagħna tat-TV. L-għan aħħari tagħna huwa li nsawwru Malta diġitali, fejn ħadd ma jibqa’ lura u kulħadd isib kontenut oriġinali u interessanti,” temm is-Sur Ivankovic.
