Lionel Messi skorja kmieni fil-partita u kkonverta l-ewwel xutt fil-penalties hekk kif is-Sibt filgħaxija Inter Miami għelbu lil Nashville SC 10-9 fil-penalty shootout fil-finali tal-Leagues Cup.
Messi skorja għall-10 darba f’seba’ logħbiet sa minn meta ngħaqad ma’ Inter Miami – kollha fil-kompetizzjoni tal-Leagues Cup bil-goal tiegħu jasal fit-23 minuta.
Il-ballun niżel f’saqajn Messi wara li pass ta’ sieħbu Robert Taylor ġie mblukkat. Messi qabeż lid-difensur ta’ Nashville Walker Zimmerman u venven xutt b’saħħtu li ntemm fir-rokna ta’ fuq tax-xellug tal-lasta, li ma ta l-ebda cans lill-goalkeeper avversarju Elliot Panicco.
Qabel dan il-goal, Messi ma kienx partikolarmnet influwenti fil-partita u kull darba li beda jmiss il-ballun, il-partitarji avversarji bdew jibbuwjawh.
