Gvern ġdid Nazzjonalista se jkun gvern b’direzzjoni, gvern iffukat, gvern li jisma’. Gvern li jemmen f’Malta Żagħżugħa għax irid ġejjieni aħjar għal kulħadd. Qal dan il-Kap tal-Partit Nazzjonalista Bernard Grech waqt attività politika f’Bormla l-Ħadd filgħodu.
Grech irrimarka li biex il-poplu jimxi ’l quddiem, Malta ma tistax titmexxa minn Gvern li skontu ddiskrevih bħala wieħed bla direzzjoni stateġika. Grech allega li l-Gvern jinsab mifxul bil-problemi li ħoloq huwa stess fis-setturi tas-saħħa, l-ekonomija, l-edukazzjoni u l-infrastruttura.
Il-Kap tal-PN fakkar fil-miżuri li ħabbar il-Partit Nazzjonalista. Huwa ddiskrevihom u qal li dawn jassiguraw ġejjieni aħjar għall-poplu Malti u Għawdxi kollu. Tenna billi appella lill-Gvern biex ma jintaxxax iż-żieda għall-għoli tal-ħajja u biex fil-Budget iħabbar inizjattivi li permezz tagħhom is-settur privat jiġi inċentivat biex jinvesti aktar.
