Il-Partit Nazzjonalista qed jaħdem fuq programm elettorali li se jagħti t-tama li dan il-pajjiż u l-poplu se jdawwar il-paġna u se jerġa’ jkollu Gvern Nazzjonalista li se jmexxih ’il quddiem kif jixraqlu. Iddikjara dan il-Kap tal-Partit Nazzjonalista bernard Grech waqt attività politika fil-Każin tal-PN fin-Naxxar.
Grech saħaq li l-poplu Malti llum iħares lejn il-Partit Nazzjonalista bħala t-tama li dan il-pajjiż jerġa’ joqrob lejn in-normalità. Skontu permezz ta’ ħidmet il-PN, iż-żgħażagħ jerġgħu jibdu jemmnu li l-futur tagħhom huwa f’pajjiżna, fejn min jixtieq jinvesti jerġa’ jibda jemmen li jista’ jagħmel dan b’suċċess f’Malta stess, fejn l-anzjan jerġa’ jibda jittama li l-pajjiż li tant ħadem għalih jista’ jroddlu lura ftit mill-ħafna li ta mingħajr ma jkollu jitkarrab.
Huwa qal li l-Partit Nazzjonalista se jibqa’ jimxi pass pass mal-poplu, se jibqa’ jisma’ dak li jrid mingħandu u se jibqa’ jaħdem qatigħ biex fi żmien qasir ikun jista’ jrodd lura l-fiduċja fi tmexxija soda li tagħti tama ġdida lil dan il-poplu maħbub.
