F’intervista li xxandret ilbieraħ filgħaxija fuq l-istazzjon nazzjonali, il-Kap Nazzjonalista Bernard Grech qal li se jkun hemm l-istudji kollha meħtieġa mill-esperti biex jgħidulu, filwaqt li huwa wkoll jara l-aspett politiku, kif jista’ bl-assi li għandhom jagħmel l-aħjar biex iwaqqaf l-emoraġġija u d-dejn jibda nieżel.
Huwa qal dan wara li l-Ħadd li għadda tkellem dwar il-fatt li għandhom problema finanzjarja u li għandhom dejn ta’ €32 miljun.
“Biex kulħadd irid jifhem li waqt li qed jikteb fuq Facebook, għax fettillu jitfa’ t-tajn jew jattakka biex juri kemm jaf, għax huwa l-ikbar analista tal-politika, jifhem li waqt li qed jikteb qed ikompli jagħmel ħsara lill-partit, qed ikompli jipperikola l-paga tal-ħaddiema u tal-familji tagħhom.”
Huwa qal ukoll li jekk hemm bżonn jinbiegħu l-każini jew jiġu kkummerċjalizzati.
“Jekk hemm bżonn u għandna bżonn irridu naraw kif l-assi tagħna jintużaw bl-aħjar mod possibbli,” qal Grech
