Gudja United …….2
Sta Lucia …………2
Gudja United ġew imċaħħda mill-ewwel rebħa tagħhom fil-Kampjonat BOV Premier hekk kif doppjetta ta’ Alan da Silva Souza tat punt lil Santa Lucia fi draw ta’ 2-2. B’hekk waqt li Santa Lucia kisbu t-tielet draw minn daqstant logħbiet, Gudja ġabru l-ewwel punt tagħhom wara zewġ telfiet.
Bla dubju, din kienet l-aħjar wirja s’issa għat-team immexxi minn Thane Micallef fejn anke setgħu ħarġu bit-tliet punti waqt li minn Santa Lucia, wieħed kien jistenna xi ħaġa aktar wara wirjiet impressjonanti fl-ewwel logħbiet tagħhom.
Gudja kellhom tliet bidliet mill-aħħar logħba tagħhom kontra Hibernians hekk kif Hubert Vella, Marcelo Dias u Temitope Abdul bdew minflok Tensior Gusman, Farid Zuniga u Justin Grioli waqt li għal Santa Lucia, Jamie Zerafa u d-debuttant Dexter Xuereb bdew flok Gianmarco Conti u s-sospiż Jan Tanti.
Kienu Santa Lucia li ħarġu l-aħjar fejn marru viċin fil-ħames minuta bi cross ta’ Victor Filho, li minnu daqqa ta’ ras ta’ Vito Plut għaddiet ftit barra.
Gudja rrispondew b’xutt minn barra l-kaxxa ta’ Temitope Abdul fit-13-il minuta li ħasad lill-goalkeeper Julani Archibald iżda dan b’ xi mod dawwar il-ballun f’ corner.
Mill-corner ta’ Pankarican mix-xellug, kien IGOR DUDAREV li għeleb lill-goalkeeper ta’ Santa Lucia b’daqqa ta’ ras biex kontra x-xejra tal-logħob tefagħhom fil-vantaġġ.
Fit-33 minuta Santa Lucia kellhom okkażjoni tajba li minnha setgħu ġabu l-iskor indaqs meta minn corner ta’ Alan Souza, Abdul ikklerja qasir u Jurgen Pisani mill-viċin tefa’ ftit għoli. Iżda erba’ minuti minn tmiem l-ewwel taqsima, Gudja tilfu ċans tajjeb b’Neil Tabone ikollu tentattiv mill-viċin imblukkat minn Archibald.
Erba’ minuti fuq il-ħin, Santa Lucia għamlulhom 1-1 meta ngħataw penalty meta Leighton Grech waqqa’ lil Victor Luiz Filho fil-kaxxa u mill-penalty, ALAN SOUZA ma falliex.
Fit-tieni taqsima, kienu Gudja li ħarġu fuq l-offensiva u fl-54 minuta, huma marru fil-vantaġġ grazzi għal corner dirett ta’ FILIP PANKARICAN mil-lemin fuq l-ewwel lasta li ħasad lil Archibald.
Wara dan il-goal, ir-ritmu naqas kemmxejn biż-żewġ goalkeepers ma tantx kienu mpenjati … sakemm fid-79 minuta, is-sostitut Gianmarco Conti kellu konklużjoni minn pożizzjoni angolata mil-lemin għal Santa Lucia salvata minn Glen Zammit.
Madankollu, minuta wara, Santa Lucia kisbu d-draw għal darba oħra hekk kif Conti għadda l-ballun lejn ALAN DA SILVA SOUZA fuq ix-xellug u dan għeleb lill-goalkeeper Gudjan b’xutt djagonali.
GUDJA U.: 1-Glen Zammit, 5-Louis Beland-Goyette, 8-Rodolfo Soares, 10-Llywelyn Cremona, 11-Filip Pankarican, 17-Gabriel Mensah, 22-Hubert Vella, 23-Neil Tabone (20-Leighton Grech 45’), 25-Marcelo Mariano Dias, 28-Igor Dudarev, 92-Temitope Abdul (24-Junior Dibola 85). – Coach: Thane Micallef
STA LUCIA: 18-Julani Archibald, 4-Andre Prates Rodrigues, 5-Jurgen Pisani, 6-Nicholas Pulis (98-Kieran Xuereb 68), 8-Patrick Silva, 9-Vito Plut (7-Gianmarco Conti 68), 10-Alan Souza, 11-Francisco Farias, 17-Victor Filho, 22-Jamie Zerafa (21-Jamie Carbone 76), 23-Dexter Xuereb – Coach: Oliver Spiteri
REFEREE: Trustin Farrugia Cann
ASS. REFEREES: Luke Portelli, Duncan Sultana
RABA’ UFF: Ezekiel Barbara
SKORERS: I. Dudarev 14, F. Pankarican 54 (GU); A. da Silva Souza 45, 80 (SL)
AMMONITI: A. Prates, N. Pulis, G. Conti (SL); M. Dias, T. Abdul, L. Cremona (GU)
PLAYER TAL-LOGĦBA: Alan da Silva Souza (Sta Lucia)
