Wara li ħaddiema f’diversi impjanti tal-kumpanija Coca-Cola fil-Ġermanja pparteċipaw fi strajk ta’ twissija ta’ 24 siegħa għal paga aktar ġusta u titjib fil-benefiċċji, dawn kisbu żieda fil-pagi u bonus ta’ darba fi ftehim kollettiv ġdid li ntlaħaq. Irrapreżentati mill-unjin NGG, il-ħaddiema ta’ din il-kumpanija se jingħataw bonus ta’ darba ta’ €400 fl-2025 kif ukoll żieda ta’ 2.9% minn Jannar 2026 u żieda oħra ta’ 2.4% minn Jannar 2027. L-iskema ta’ kontribuzzjoni għall-pensjoni tal-kumpanija wkoll mistennija li tiżdied mill-2027. Dan il-ftehim kollettiv ġdid se jibqa’ fis-seħħ għal 28 xahar.
L-unjin NGG kienet insistiet li l-ħaddiema qegħdin jiffaċċjaw żmien diffiċli u kienet ħabbret li minkejja li l-kumpanija tagħmel profitti rekord, ħafna impjegati ma kellhomx paga biżżejjed biex ilaħħqu mal-ħajja.
“Nagħmlu x-xogħol… ħaqqna ż-żieda”
Skont il-ħaddiema, l-azzjoni kienet meħtieġa mhux biss biex tikkoreġi l-inugwaljanzi, iżda wkoll biex tfakkar lill-kumpanija li l-qligħ ma jistax ikun eskluż għall-ħaddiema li jagħmlu x-xogħol essenzjali kuljum. “Nagħmlu xogħol li jġib il-profitti u huwa ġust li naħdmu f’kundizzjonijiet li jirriflettu l-kontribuzzjoni tagħna,” sostniet waħda mill-ħaddiema.
Id-deputat chair u kap tan-negozjati, Kathrin Flohr qalet li ż-żewġ naħat ftiehmu fuq pakkett ġust li jipprovdi sigurtà ta’ pjannar fit-tul. Il-marka tal-Coca-Cola f’dan il-pajjiż hija mmanifatturata, iddistribwita u mibjugħa minn CCEP DE. Il-kumpanija topera f’24 lokalità fil-Ġermanja inklużi 13-il faċilità u timpjega madwar 6,500 persuna.
