Minn Cristian Muscat
Hamrun Spartans ……1
Marsaxlokk ………..…..0
Hamrun Spartans kellhom jitħabtu biex għelbu l-isfida ta’ Marsaxlokk bl-iskor minimu ta’ 1-0 f’partita kwieta bl-azzjonijiet perikolużi fuq kull naħa jkunu skarsi.
B’hekk Hamrun kisbu t-tielet rebħa konsekuttiva u laħqu lil Birkirkara fil- quċċata tal-klassifika b’disa’ punti.
Ta’ min ifaħħar ukoll il-prestazzjoni tax-Xlukkajri mmexxija mill-coach Pablo Doffo li offrew oppożizzjoni denja u li kieku ħarġu b’punt mill-partita ma kienu jisirqu xejn.
Għat-tieni logħba konsekuttiva, Hamrun reġgħu kellhom jgħaddu mingħajr is-servizzi tal-goalkeeper internazzjonali Malti, Henry Bonello, wara li weġġa’ fir-rebħa kbira ta’ 4-1 kontra ċ-champions Hibernians, u b’hekk reġa’ ddefenda l-lasti l-goalkeeper ta’ riserva, Pablo Sanchez.
Hamrun fetħu l-iskor proprju fl-ewwel azzjoni perikoluża li ħolqu fid-disa’ minuta meta minn azzjoni ta’ corner, il-ballun spiċċa għand JONNY TORRES li minn tarf il-kaxxa spara l-ballun fix-xibka.
Peró jekk l-Ispartans taw l-impressjoni li kienet ġejja xi goleada, ir-ritmu naqas fejn il-logħob kien konċentrat f’nofs biex l-azzjoni li kien imiss waslet fis-36 minuta, min-naħa ta’ Marsaxlokk permezz ta’ freekick ta’ Leandro Aguirre li stampa mal-barriera, biex mir-rebound l-istess player Arġentin ra x-xutt fil-baxx jintemm barra.
L-ewwel 35 minuta tat-tieni taqsima kienu ferm fqar ikkaratterizzati minn logħob monotonu b’Marsaxlokk jagħmlu minn kollox biex jippruvaw jinfiltraw lid-difiża avversarja iżda kull darba li ppruvaw jagħmlu dan sabu difiża ferm kumpatta u organizzata li annullat għal kollox l-attakki tagħhom.
Dan sal-81 minuta meta s-sostitut Dodo kellu xutt fil-baxx li ntemm barra.
Huma komplew jippressaw għat-tieni goal u żewġ minuti biss wara, free-kick tat-Talajn Matteo Fedele għadda jħakkek mal-mimduda.
Iżda fil-85 minuta Marsaxlokk kienu għoddhom kisbu d-draw meta s-sostitut Alfred Effiong minn taħt il-lasta ħareġ l-aħjar ta’ Pablo Sanchez li salva bi bravura.
HAMRUN S.: 56-Pablo Sanchez, 3-Bruno Ederson Domingos, 4-Steve Borg, 6-Matthew Guillaumier, 7-Luke Montebello (77-Shaisen Attard 68), 9-Elvis Mashike Sukisa, 14-Rodrigo Torre Callegari, 20-Matteo Fedele (5-Sven Xerri 83), 63-Jonny (10-Dodo 68), 91-Emerson Marcelina, 94-Ryan Camenuli – Coach: Branko Nisevic
MARSAXLOKK: 23-Jose Maria Gobbi, 5-Christopher Edafe Uzeh (11-Alfred Effiong 79), 7-Ayrton Attard (10-Conor Borg 58), 14-Omar Walter Serrano, 19-Emerson Vella, 21-Adrian Santiago Ferrareis, 27-Leandro Aguirre, 37-Fabian Santiago Moracci (22-Dale Mifsud 74), 77-Wellington De Sousa Valentim, 88-Dejan Vukovic, 99-Tiago Adan Fonseca – Coach: Pablo Doffo
REFEREE: Darryl Agius
ASS. REFEREES: Luke Portelli, Kurt Saliba
RABA’ UFF: Slobodan Petrovic
SKORER: Jonny 9 (HS)
AMMONITI: Jonny, M. Guillaumier, E. Mashike Sukisa, S. Xerri, R. Camenzuli (H), E. Vella, T. Adan Fonseca, L. Aguirre (M)
PLAYER TAL-LOGĦBA: Matteo Fedele (Hamrun S.)
