“Ħaqqu prosit dak ir-raġel li jien ma nafux, li b’mod intelliġenti ħafna beda jkellem iż-żagħżugħ li daħal fil-Knisja tagħna tal-Balluta u bil-kelma t-tajba rnexxielu joħorġu ‘l barra mill-knsija. Meta ż-żagħżugħ tela’ fejn l-artal u tfewlu l-mikrofonu għax beda jgħajjat, marru xi rġiel lejl iżda hu beda jgħidilhom biex ma jersqux għax joqtolhom. Kien hemm wieħed li imma beda jkellmu bil-kelma t-tajba u kien hu li rnexxielu joħorġu ‘l barra mill-Knisja. Jien kont rieqed dak il-ħin imma ġew jinfurmawni u nżilt mill-ewwel u sibt li ż-żagħżugħ kien diġà barra mill-knisja”.
Dan sostnieh ma’ Talk.mt, il-pirjol tal-Karmelitani fil-Balluta, Fr Charles Mallia, li ma naqasx li jesprimi t-tifħir u rringrazzjament tiegħu lil dak ir-raġel li rnexxielu joħroġ liż-żagħżugħ mill-knisja bil-kelma t-tajba.
Meta kuntattjat Fr Mallia qalilna li “jien kont rieqed u nżilt mill-ewwel fil-Knisja. Ma kienx hemm ħsarat. Hu tela’ fejn hemm l-artal u beda jitkellem minn hemm. Qaleb il-leġiju. Bejnietna bdejna ngħidu nzertajna li għandna injam b’saħħtu. Dan qabad jgħajjat kif tela’ fuq l-altar u immedjatament tfewlu l-mikrofonu. Telgħu xi rġiel imma hu qalilhom li jekk jersqu lejh joqtolhom. Kien hemm raġel intelliġenti li beda jkellmu . Ħaqqu prosit għax bil-kelma t-tajba rnexxieu joħorġu barra mill-knisja”.
