Fir-rebħa ta’ 3-1 kontra l-Italja, valida mir-round ta’ kwalifikazzjoni tal-Euro 2024, l-attakkant Ingliż, Harry Kane, kompla jikser ir-rekords.
Huwa kiser ir-rekord tal-leġġendarju Bobby Charlton li kien ilu fis-seħħ mill-1970. Dan kien jikkonsisti f’goals skorjati f’Wembley Stadium.
L-attakkant ta’ Bayern Munich skorja minn penalty, fit-32 minuta, mirbuħ minn Jude Bellingham. B’hekk, filwaqt li kiseb id-draw wara li Gianluca Scamacca (15) fetaħ l-iskor għall-Azzurri, Kane laħaq ir-rekord ta’ Charlton għal total ta’ 23 goal.
Imbagħad, wara li Marcus Rashford xeħet lill-Ingliżi fil-vantaġġ, fis-57 minuta, l-istess Kane ssiġilla r-rebħa … meta fis-77 minuta, seraq ballun lil difensur Taljan, avvanza u għeleb lil Gianluigi Donnarumma.
Dan il-goal kien jimmarka l-24 goal tiegħu f’Wembley Stadium u l-61 personali bil-flokk tal-Ingilterra biex kompla kabbar it-total tiegħu, li fil-veritá diffiċli biex jintlaħaq.
Il-leġġendarju l-ieħor, Gary Lineker, jinsab fit-tielet post bi 22 goal f’Wembley meta qatt ma rnexxielu jilħaq ir-rekord ta’ Charlton.
