Żewġ Nepaliżi tressqu l-Qorti mixlija li kkawżaw ġrieħi gravi lil xulxin wara argument bejniethom u li kisru l-paċi pubblika.
Il-Prosekuzzjoni spjegat li nhar il-Ġimgħa li għadda, il-Pulizija ġew infurmati li kien seħħ argument viċin it-terminus tal-karozzi tal-linja fil-Belt Valletta.
Meta l-Pulizija marru fuq il-post, huma sabu żewġ Nepaliżi, it-tnejn residenti San Pawl il-Baħar, jargumentaw bejniethom. Huma ttieħdu l-klinika tal-Furjana għall-assistenza medika.
Id-Difiża għamlett talba għall-ħelsien mill-arrest tal-imputati, bil-Prosekuzzjoni toġġezzjona minħabba li l-eks tfajla ta’ wieħed minnhom għad trid tixhed.
L-Avukati Difensuri argumentaw li ż-żewġ imputati għandhom impjieg stabbli u li din kienet l-ewwel darba li xellfu difrejhom mal-liġi kemm ilhom jgħixu Malta.
Il-Qorti preseduta mill-Maġistrat Joseph Gatt tat il-ħelsien mill-arrest liż-żewġ imputati taħt depożitu ta’ €1,000 u garanzija personali ta’ €4,000 kull wieħed.
Il-Prosekuzzjoni tmexxiet mill-Ispettur Jeffrey Rizzo flimkien mal-Avukat Brandon Bonnici mill-Uffiċċju tal-Avukat Ġenerali. Wieħed mill-imputati kien assistit mill-Avukat Alexander Scerri Herrera mentri l-ieħor kien assistit mill-Avukat tal-Għajnuna Legali Noray Galea.