Aktar kmieni llum jidher li twettqet l-awtopsja fuq il-fdalijiet tal-katavru li nstab ilbieraħ f’bagalja barra l-promenade tal-Gżira.
Skont sorsi mill-investigazzjoni, il-pulizija temmen li l-vittma seta’ kien qed jintuża biex tiġi traffikata d-droga peress li skont l-ewwel indikazzjonijiet mill-awtopsja jidher li kellu droga ppakkjata fl-istonku tiegħu.
L-investigaturi jemmnu li l-omiċidju seħħ ftit sigħat biss qabel ma nstabet il-bagalja, peress li l-katavru ma kienx għadu beda jiddekomponi. In-nuqqas ta’ piż adegwat fuq il-bagalja wassal biex din żammet fil-wiċċ, u b’hekk ġiet innutata u rkuprata mill-pulizija.
Skont sorsi qrib l-investigazzjoni jidher ukoll li s-suspettat allegatament uża mannara fl-omiċidju. Minkejja l-qagħda makabra tal-katavru, l-investigaturi qed jistudjaw il-karatteristiċi tal-wiċċ sabiex jippruvaw jidentifikaw il-vittma. Rapporti oħra mhux konfermati qegħdin jgħidu li l-vittma kellu tattoos distintivi fuq ġismu.
Qiegħed ikun irrappurtat ukoll li f’dan l-istadju mhux qiegħed ikun eskluż li l-vittma kellu xi diżabbiltà skont il-mod ta’ kif instab imqiegħed fil-bagalja.
Huwa mifhum ukoll li l-Pulizija qegħdin jeżaminaw il-filmati tas-CCTV minn diversi lokalitajiet biex jippruvaw jinstabu l-ħatja wara dan ir-reat.
Din is-sejba orribbli tfisser ukoll li dan huwa l-ħames omiċidju li seħħ f’Malta din is-sena.
10:00 a.m:
Il-fdalijiet tal-katavru li nstabu fi stat makabru lbieraħ waranofsinhar jidher li huma ta’ raġel ta’ madwar 50 sena.
Minkejja dan rapporti oħra qegħdin jindikaw li l-età tal-vittma tista’ tvarja bejn l-40 u anke aktar minn 50 sena.
B’rabta mal-każ għaddejja investigazzjoni maġisterjali u l-Pulizija tinsab għaddejja bl-investigazzjonijiet tagħha.
Intant aktar tard illum mistennija ssir l-awtopsja fuq il-fdalijiet tal-katavru li jistgħu jkomplu jixħtu aktar dawl dwar dan il-każ.
