Riżultati ferm pożittivi għas-selezzjonijiet Maltin li fi tmiem din il-ġimgħa lagħbu żewġ partiti ta’ ħbiberija kontra t-tim nazzjonali Taljan tal-Masters.
Fl-ewwel partita li ntlagħbet is-Sibt waranofsinhar, is-selezzjoni Maltija taż-żgħażagħ mmexxija minn Chris Attard għelbet lit-Taljani 4-0.
Kienet logħba fejn il-Maltin iddominaw mill-bidu sal-aħħar b’Alessandro Amore li kien il-protagonista meta skorja żewġ gowls b’Luke Bajada u Keith Calleja li żiedu aktar gowls għat-tim tagħhom.
Fit-tieni logħba tal-Ħadd filgħodu, din id-darba kien imiss lil Malta Masters li jilagħbu kontra t-Taljani u anke hawn il-Maltin kellhom is-sodisfazzjon li jirbħu din il-partita bl-iskor ta’ 1-0 bil-gowl uniku skorjat minn Kevin Micallef.
It-tim nazzjonali Taljan tal-Masters qed jipprepara ruħu għat-tazza tad-dinja tal-istess kategorija li se ssir f’Nottingham f’Awwissu li ġej u kien għaddej b’kamp ta’ taħriġ tul dawn it-tlett ijiem li għaddew.