Dimostranti f’Hong Kong kienu involuti fi ġlied mal-Pulizija, f’turija ta’ oppożizzjoni kontra d-deċiżjoni taċ-Ċina li żżid il-kontroll tagħha fuq it-territorju Ċiniż. Dik tal-lum kienet l-akbar dimostrazzjoni li żvolġiet f’Hong Kong sa minn mindu l-belt sfat maħkuma mill-pandemija tal-coronavirus f’Jannar.
Rapportifil-midja lokali jgħidu li l-Pulizija u l-forzi tal-ordni kellhom jagħmlu użu minn kanuni tal-ilma u gass tad-dmugħ wara li mijiet ta’ dimostranti nġabru biex juru d-diżapprovazzjoni tagħhom kontra leġiżlazzjoni dwar is-sigurtà nazzjonali.
Il-Pulizija wissew lill-miġegħma li kienu qed jieħdu sehem f’attività illegali u fi stqarrija li ħarġu aktar tard qalu li d-dimostranti anke tefgħu xi oġġetti fil-konfront tagħhom.
Mill-inqas 180 persuna sfaw arrestati, filwaqt li mill-inqas erba’ uffiċjali tal-Pulizija ndarbu.
