Minn Cristian Muscat
Kif bdiet l-imħabba tiegħek lejn ir-Regatta?
L-imħabba tiegħi lejn ir-regatta bdiet billi kont inkun il-Ponta tal-Isla ma’ missieri, u kienu qaluli biex ninżel coxwin. Inżilt u l-qaddiefa dejjem kienu jgħiduli għal xi qadfa u l-hajra li naqdef dejjem bdiet tiżdied.
X’tikkummenta fuq ir-rebħ tax-Shields kollha mill-Isla Regatta Club matul ir- Regatta ta’ Jum il-Vitorja li għaddiet?
Ir-rebħ tax-shield hija l-akbar sodisfazzjon li qaddief jista’ jkollu wara sena sħiħa taħrig kontinwu. Huwa ta’ unur kbir li tara li klabb li tant huwa għal qalbek jirbaħ ħaga storika – ir-rebħ ta’ tliet shields speċjalment li kont parti mit-tim. Hija emozzjoni kbira meta tara l-partitarji tant ferħanin!
Kif tqis il-livell tar-Regatta f’pajjiżna?
Jiena nemmen li l-livell tar-regatta speċjalment fil-Kottonera huwa għoli ħafna u kull klabb ikun armat biex ikun ta’ sfida. Nispera li l-awtoritajiet jieħdu ħsieb li din it-tradizzjoni ma tintilifx.
X’tikkummenta fuq l-organizzazzjoni tar-Regatta Nazzjonali?
Jiena nahseb li hemm ħafna affarijiet li jistgħu jitranġaw bħala organizzazzjoni. Fir-Regatta qed naraw affarijiet li qatt ma rajna bħalhom speċjalment id-dewmien esaġerat li aħna bħala qaddiefa u coxwins nagħmlu tul ta ħin fuq l-istart għalxejn. Prova ċara ta’ dan hija li l-aħħar tiġrija li kienet deċiżiva fejn kellha tmur ix-shield saret fid-dlam. Dan nemmen li hu nuqqas ta’ rispett lejna l-qaddiefa wara sena sħiħa ta’ sagrifiċċji aħna u l-familji tagħna.
Kif qed thares lejn il-futur tiegħek fir-Regatta?
L-għan tiegħi huwa dak li nibqa’ nittrenja biex dejjem inkun ta’ sfida għal ħaddieħor.
Għaddi messaġġ finali lil kull min jixtieq jibda jieħu sehem fir-Regatta billi jingħaqad ma’ xi klabb lokali.
Ir-Regatta huwa sport mill-isbaħ li jinvolvi sagrifiċċju, dedikazzjoni u li ma taqta’ qalbek qatt, ikun xi jkun ir-riżultat!