Iċ-Ċina kulma jmur qed tiffaċċja dejjem aktar pressjoni fir-rigward tal-pandemija tal-coronavirus hekk kif ir-Renju Unit ingħaqdet fis-seja internazzjonali għal inkjesta dwar kif iċ-Ċina kkontrollat l-imxija tal-virus.
L-Organizzazzjoni Dinjija tas-Saħħa bejn illum u għada se tkun qed iżżomm assemblea virtwali, il-President Amerikan Donald Trump mistenni li jagħmel kritika ħarxa fil-konfront tagħha.
Ir-Renju Unit intant qed jappoġġja riżoluzzjoni tal-Unjoni Ewropea li qed tħeġġeġ għal “evalwazzjoni imparzjali, indipendenti u komprensiva” tar-rispons internazzjonali għall-Covid-19.
Għalkemm ir-riżoluzzjoni ma tirreferix b’mod espliċitu għaċ-Ċina, bosta qed iqisu ir-riżoluzzjoni bħala l-bidu ta’ ġlieda twila dwar l-oriġini tal-marda.
Mill-inqas 116-il pajjiż iffirmaw ir-riżoluzzjoni – ferm aktar mir-rekwiżit ta’ żewġ terzi biex din tintlaqa’.
Il-WHO u bosta esperti jemmnu li l-virus oriġina minn suq fejn kienu qed jinbiegħu annimali selvatiċi.
Intant il-Ministeru Ċiniż għall-Affarijiet Barranin qed jisħaq li huwa prematur li titnieda investigazzjoni dwar l-oriġini u l-imxija tal-virus, li ħalla aktar minn 300,000 vittma minn madwar id-dinja.
