Id-Deputat Mexxej tal-Partit Laburista u Viċi President tas-Soċjalisti u d-Demokratiċi tal-Parlament Ewropew Alex Agius Saliba qal li huma biss is-soċjalisti li jistgħu joffru soluzzjonijiet għall-isfidi li qed tiffaċċja d-dinja bħalissa. Meta kien qed jagħlaq il-Kunsill ta’ Socialist International li kien qed jitlaqqa’ għall-ewwel darba f’dawn il-jiem f’Malta, Agius Saliba elenka tliet fatturi li bihom il-partiti soċjalisti madwar id-dinja jistgħu jibqgħu jattiraw il-votanti, billi jkunu kunfidenti jieħdu deċiżjonijiet meħtieġa għan-nies, jesponu l-gideb tal-populisti, u jiffukaw fuq x’jolqot l-iktar lin-nies. Spjega li s-Soċjalisti diġà wrew fil-passat x’bidliet jistgħu jwettqu u kemm għadhom relevanti għall-futur biex ikollna dinja aħjar għal kulħadd.
Irrimarka li l-Kunsill tas-Socialist International qed jitlaqqa’ fi żmien meta d-demokrazija qed tkun mhedda mill-populiżmu u l-lemin estrem li qed ikomplu jiżdiedu fl-appoġġ, għad-detriment tal-partiti xellugin madwar id-dinja. Spjega kif lil hinn minn xtutna, bosta pajjiżi mifnija bil-gwerer u l-kunflitti, fosthom fil-Lvant Nofsani, u ħadd mhu jirnexxielu jwaqqaf lil Iżrael milli ikompli joħloq tbatija u mrar lill-Palestinjani, bl-atroċitajiet u l-ġenoċidju f’Gaża. Saħaq li huwa għalhekk li jeħtieġ jinstabu soluzzjonijiet malajr kemm jista’ jkun għall-kisba tal-paċi u s-saltna tad-dritt fuq livell internazzjonali.
Żied li din irid jitqies fl-isfont ta’ sfidi oħrajn bħall-inflazzjoni, l-inugwaljanza, u diskrepanzi bejn is-sessi u bejn il-ħaddiema. Irrimarka li s-sitwazzjoni f’Malta mhux l-istess bħal ta’ barra, għax hawn mhux ngħixu l-istess kriżijiet li għandhom pajjiżi barranin. Agius Saliba enfasizza li Gvern Laburista jżomm lin-nies fiċ-ċentru tad-deċiżjonijiet u qed itejjeb il-kwalità tal-ħajja tan-nies. Qal li din hija r-raġuni li l-Partit Laburista għadu fil-Gvern għal dawn l-aħħar 13-il sena.
Sostna li dan huwa riżultat ta’ deċiżjonijiet f’waqthom, b’mudell ekonomiku li jirrendi f’benefiċċji għan-nies. Temm jgħid li dan huwa riżultat ta’ politika progressiva li jeħtieġ tibqa’ titħaddem biex tkompli ssir kuxjenza soċjali u tipproteġi l-interessi tan-nies.
