Waqt żjara fil-lukanda Phoenicia fil-Furjana, id-Deputat Prim Ministru u Ministru għall-Affarijiet Barranin u t-Turiżmu Ian Borg ħa l-opportunità biex jiltaqa’ mal-impjegati u personalment jirringrazzjahom ta’ xogħolhom f’wieħed mill-aktar żminijiet impenjattivi tas-sena.
F’pajjiżna, huwa stmat li madwar 30,000 ħaddiema full-time u part-time qed jaħdmu f’lukandi, ristoranti, u servizzi oħra ta’ ospitalità matul l-istaġun tal-festi.
Id-Deputat Prim Ministru Ian Borg esprima gratitudni għad-dedikazzjoni bla waqfien tal-ħaddiema fis-settur tat-turiżmu u rrikonoxxa l-isforzi indispensabbli tagħhom biex jiżguraw li kemm ir-residenti kif ukoll it-turisti f’Malta u Għawdex igawdu lejlet l-Ewwel tas-Sena.
“Hekk kif pajjiżna jingħaqad biex jiċċelebra l-bidu ta’ sena ġdida, ħafna minnkom qegħdin hawn biex tiżguraw li l-mistednin u t-turisti sħabna joħolqu l-aqwa memorji. Id-dedikazzjoni tagħkom hija ċ-ċavetta tal-industrija tat-turiżmu b’saħħitha ta’ Malta, u l-isforzi tagħkom huma apprezzati,” qal id-Deputat Prim Ministru Ian Borg. Huwa appella wkoll lil min iħaddem biex jagħti prijorità lill-ħaddiema tagħhom, filwaqt li enfasizza li l-investiment fil-ħiliet u l-benesseri tagħhom huwa essenzjali għall-prosperità fit-tul tas-settur.
Filwaqt li rrikonoxxa l-kontribuzzjonijiet ta’ min joffri servizzi essenzjali oħra, id-Deputat Prim Ministru enfasizza l-isforz kollettiv meħtieġ biex in-nazzjon jibqa’ jaħdem bla xkiel matul il-vaganzi.
Għal din l-okkażjoni ingħaqdu mad-Deputat Prim Ministru, l-Uffiċjal Kap Eżekuttiv tal-Awtorità Maltija għat-Turiżmu Carlo Micallefi u rappreżentanti tal-Assoċjazzjoni Maltija għall-Lukandi u r-Ristoranti (MHRA), fosthom il-President Tony Zahra u l-Uffiċjal Kap Eżekuttiv Andrew Agius Muscat. Iż-żjara enfasizzat l-impenn tal-gvern li jirrikonoxxi u jappoġġja lil dawk li għandhom rwol kritiku fl-istorja ta’ suċċess turistiku ta’ Malta.
