L-avukati ta’ Roderick Cassar, li jinsab mixli bil-qtil ta’ martu Bernice, talbu li l-inkjesta li kien għamel l-Imħallef irtirat Geoffrey Valenzia dwar il-każ, għandha tiġi esebita fil-Qorti.
L-imputat jinsab mixli b’xejn inqas minn 15-il akkuża b’dik ewlenija tkun l-omiċidju-femiċidju ta’ Bernice. Il-każ seħħ nhar it-22 ta’ Novembru li għadda f’Kordin.
L-Avukat Franco Debono, li qed jidher għall-imputat, talab li jingħata kopja tar-rapport tal-inkjesta li kien għamel l-imħallef irtirat Geoffrey Valenzia dwar il-każ. F’dan il-waqt, il-Prosekuzzjoni staqsiet x’kienet ir-rilevanza għal dan it-talba tad-Difiża.
Il-Maġistrat Joe Mifsud, li qed jippresjedi fil-kawża, qal li l-avukat difensur kien jaf mnejn jista’ jagħmel rikors biex jakkwista kopja tal-inkjesta, u għalhekk ma kellux għalfejn jagħmel din it-talba li biha seta’ jgħabbi lill-Qorti.
Il-Prosekuzzjoni qiegħda titmexxa mill-Avukati Angele Vella, Anthony Vella u Darlene Grima mill-Uffiċċju tal-Avukat Ġenerali flimkien mal-Ispetturi Wayne Camilleri, Shawn Pawney u Paul Camilleri.
L-Avukati Franco Debono Debono, Arthur Azzopardi, Marion Camilleri u Jacob Magri dehru għall-imputat. L-Avukati Stefano Filletti, Marita Pace Dimech, Ann Marie Cutajar u Rodianne Sciberras dehru parte civile.
Il-każ ikompli f’Mejju.
