Ir-raġel li sfortunatament tilef ħajtu kawża tal-ġrieħi serji li sofra aktar kmieni llum ġie identifikat bħala Anthony Farrugia.
Il-Mellieħi ta’ 62 sena ngħata l-ewwel assistenza minn tim mediku wara li waqa’ t-taraġ tar-residenza tiegħu hu u jġorr xi affarijiet. Skont informazzjoni li kiseb Talk.mt jidher li r-raġel kien qiegħed jagħmel xi xogħol fir-residenza tiegħu stess.
L-investigazzjonijiet b’rabta ma’ dan il-każ għadhom għaddejjin.
5:30 p.m: Imut ir-raġel li waqa’ t-taraġ fil-Mellieħa
Il-Pulizija fi stqarrija maħruġa minnha kkonfermat li r-raġel li aktar kmieni dalgħodu ddaħħal l-Isptar bi ġrieħi serji sfortunatament kien tilef ħajtu.
1:00 p.m: Raġel fil-periklu tal-mewt wara li waqa’ t-taraġ fil-Mellieħa
Raġel iddaħħal l-Isptar b’urġenza wara li aktar kmieni għall-ħabta tal-10:15 a.m kien involut f’inċident f’residenza fi triq Pietru Pawl Caruana fil-Mellieħa.
Minn investigazzjoni li saret irriżulta li raġel ta’ 62 sena mill-Mellieħa kien sofra xi ġrieħi wara li waqa’ t-taraġ hu u jġorr xi affarijiet.
Fil-post issejjaħ minnufih tim mediku li ta l-ewwel assistenza sakemm ir-raġel seta’ jittieħed lejn l-Isptar Mater Dei permezz ta’ ambulanza. Aktar tard huwa ġie ċċertifikat li sofra minn ġrieħi serji.
Bil-każ ġiet infurmata l-Maġistrat tal-Għassa Dr Gabriella Vella li ħatret inkjesta filwaqt li l-investigazzjonijiet tal-Pulizija għadhom għaddejjin.
