Raġel qed isofri ġrieħi serji wara li aktar kmieni għall-ħabta tat-8:00 a.m kien involut f’inċident f’sit ta’ kostruzzjoni li seħħ fi Triq Ħal Farruġ fis-Siġġiewi.
Minn stħarriġ illi sar irriżulta li raġel Tork ta’ 43 sena residenti Birkirkara sofra xi ġrieħi wara li waqa’ minn fuq struttura tal-ħadid.
Fil-post issejħet ambulanza u tim mediku li taw l-ewwel għajnuna sakemm ir-raġel seta’ jittieħed lejn l-Isptar għal aktar kura.
Bil-każ ġiet infurmata l-Maġistrat tal-Għassa Josette Demicoli li ħatret diversi esperti sabiex jassistuha fl-inkjesta li ġiet appuntata.
L-investigazzjonijiet tal-Pulizija dwar dan l-inċident għadhom għaddejjin.