Iktar minn 100 persuna, li f’Lulju li għadda ħadu sehem f’dimostrazzjonijiet kontra l-gvern ta’ Kuba, ingħataw sentenzi ta’ ħabs li jvarjaw bejn sitta u 30 sena. Protesti ta’ dan it-tip huma rari ħafna ġewwa Kuba.
B’kollox kien hemm 129 persuna akkużati quddiem il-qrati, u minnhom wieħed biss instab mhux ħati. Il-bqija ġew misjuba ħatja ta’ sedizzjoni u serq. Fil-protesti ta’ Lulju pparteċipaw eluf ta’ Kubani fejn dawn niżlu fit-toroq ta’ dan il-pajjiż bl-għajta ta’ “libertà”. Ġabriet tal-massa mhux awtorizzati huma meqjusa bħala illegali ġewwa Kuba u dakinhar iktar minn 1,000 persuna kienu ġew arrestati, b’ħafna minnhom jinħelsu ftit wara.
Dawn id-dimostrazzjonijiet, li kienu l-ikbar li qatt kien hemm f’dawn l-aħħar deċenji, saru minħabba l-kriżi ekonomika severa li qiegħed jesperjenza dan il-pajjiż bid-dimostranti jsemmgħu r-rabja tagħhom dwar il-prezzijiet għoljin u n-nuqqas ta’ ikel u mediċina. Ħafna kienu wkoll kritiċi għall-mod ta’ kif il-gvern Kuban mexxa waqt il-pandemija tal-Covid-19.
Min-naħa tagħhom il-mexxejja tal-partit Komunista Kuban iddeskrivew lid-dimostranti bħala appoġġjati mill-Istati Uniti u ntiżi biex iwaqqgħu l-gvern.
