Il-Bank of Valletta għadu kif nieda BOV SmartPay, identità ġdida li tiġbor flimkien is-soluzzjonijiet ta’ pagament għan-negozjanti taħt isem wieħed. Filwaqt li s-servizzi għan-negozjanti kienu parti mill-portafoll ta’ servizzi offruti mill-Bank għal għexieren ta’ snin, l-introduzzjoni ta’ BOV SmartPay issaħħaħ l-enfasi li l-Bank qed jagħmel fuq soluzzjonijiet immirati lejn dan is-settur. Dawn huma soluzzjonijiet li joffru modi avvanzati, flessibbli u siguri ta’ kif wieħed jirċievi pagamenti, imfassla għal suq li dejjem qed jevolvi.
BOVSmartPay jaqsam is-servizzi ta’ pagamenti għan-negozjanti tal-Bank fi tliet soluzzjonijiet ewlenin. Is-sistema EPOS tipprovdi terminals ta’ pagamenti bil-kard għall-ħwienet u stabbilimenti. Dawn huma sikuri u affidabbli, u jiżguraw tranżazzjonijiet effiċjenti u bla xkiel. Il-portal tal-kummerċ elettroniku jippermetti lin-negozji jaċċettaw pagamenti diġitali onlajn, u jwieżnu d-domanda dejjem tikber għax-xiri onlajn. Is-soluzzjoni BOV MobilePOS, imnedija s-sena l-oħra, toffri sistema ta’ pagamenti bil-kards li hija portabbli u flessibbli. Din is-sistema tippermetti lin-negozji jipproċessaw it-tranżazzjonijiet kullimkien bl-użu tat-telefon ċellulari tagħhom.
Chris Degabriele, Kap tal-eBanking fil-Bank of Valletta, iddeskriva l-BOVSmartPay S bħala trasformazzjoni fil-mod kif il-Bank jappoġġja n-negozji fix-xenarju tal-pagamenti. “In-negozji llum m’għandhomx bżonn biss terminals biex jgħaddu l-pagamenti. Huma jeħtieġu soluzzjonijiet integrati li jaħdmu b’effiċjenza f’channels differenti. Il-BOVSmartPay huwa impenn ċar li l-Bank qed jieħu favur is-simplifikazzjoni u t-tisħiħ tas-servizzi mmirati lejn in-negozjanti tagħna, filwaqt li niżguraw li n-negozji ta’ kull daqs ikollhom aċċess għal soluzzjonijiet ta’ pagamenti effiċjenti, siguri u mibnija għall-futur.”
Bħala parti minn dan l-impenn imġedded, il-Bank introduċa paġna ddedikata għall-BOVSmartPay fuq is-sit BOV.com, fejn in-negozjanti jistgħu faċilment isibu informazzjoni dettaljata dwar is-servizzi kummerċjali differenti. Din il-paġna tipprovdi wkoll formoli onlajn biex wieħed japplika għal servizzi ġodda u servizzi oħra ta’ pagamenti li negozju jista’ jkollu bżonn. Hemm ukoll tim dedikat biex jassisti lin-negozjanti f’dak kollu li jista’ jkollhom bżonn, biex ikun żgurat li jinqdew fl-iqsar żmien possibbli, filwaqt li jingħataw assistenza mfassla apposta għalihom, b’hekk ikompli jittejjeb is-servizz tal-klijent.
Roderick Armeni, Lead – Business Generation & Sales fil-funzjoni tal-eBanking, enfasizza l-vantaġġi għan-negozji. “Il-pagamenti kulma jmur dejjem qed jevolvu, u llum il-klijenti jistennew tranżazzjonijiet li jsiru bla xkiel u mingħajr l-użu ta’ flus kontanti. Bil-BOVSmartPay, in-negozji jistgħu joffru esperjenza serena f’diversi modi ta’ ħlas, kemm jekk minn ħanut, jew onlajn. Dan hu dak li nifhmu meta ngħidu li rridu noffru lin-negozjanti tagħna l-aqwa għodda biex jikbru u jirnexxu f’ekonomija li tagħti prijorità lis-servizi diġitali.”
It-tnedija ta’ BOVSmartPay turi l-impenn tal-Bank of Valletta li jsaħħaħ l-appoġġ tiegħu lin-negozji billi joffri ekosistema ta’ pagament aktar simplifikata, iffokata fuq il-klijent, u avvanzata mil-lat teknoloġiku.
Għal aktar informazzjoni dwar BOVSmartPay, wieħed jista’ jżur www.bov.com jew jikkuntattja lit-tim fuq [email protected]
