Il-Bank of Valletta ħabbar l-appoġġ tiegħu lejn il-Knisja tat-Trinità Qaddisa tal-Marsa fi proġett importanti ta’ restawr li jinvolvi erba’ pitturi ikoniċi tal-artist rinomat Malti Gianni Vella. Dawn ix-xogħlijiet monumentali, li jmorru lura għas-sena 1912, issa qed jiġu restawrati bir-reqqa, biex jingħataw lura l-glorja oriġinali tagħhom.
L-erba’ pitturi, kull waħda bil-kejl impressjonanti ta’ 2.25 metri b’4 metri, jinsabu fil-Knisja tat-Trinità Qaddisa u jirrappreżentaw il-fażi ekkleżjastika bikrija ta’ Vella. Ix-xogħlijiet tal-arti li qed jiġu restawrati jinkludu lil ‘San Ġwann jgħammed lil Kristu fix-Xmara Ġordan’, ‘Abraham iqim it-tliet Viżitaturi Anġeliċi’, ‘Il-Mibgħat tal-Ewwel Appostli’, u ‘Alla jagħti n-nifs tal-Ħajja lil Adam’.
Dawn il-pitturi juru l-ħila ta’ Vella b’teknika li kkaratterizzat ix-xogħol bikri tiegħu qabel ma żvilippa stil aktar kuraġġuż u impasto influwenzat mill-artisti Taljani tal-Macchiaioli. Iktar milli jiġbed l-influwenza minn Cali, Pisani jew Palombi, ix-xogħol ta’ Vella jersaq eqreb lejn dak ta’ Silvio Galimberti u Francesco Grandi rispettivament.
Ix-xogħol ta’ konservazzjoni, li sar minn Pierre Bugeja ta’ Prevarti Co Ltd, diġà ra t-tlestija b’suċċess ta’ tnejn mix-xogħlijiet tal-arti – ‘Il-Mibgħat tal-Ewwel Appostli’, u ‘Alla jagħti n-nifs tal- Ħajja lil Adam’ issa reġgħu lura fil-post ewlieni tagħhom fi ħdan il-Knisja.
Ernest Agius, Chief Operations Officer, akkumpanjat minn Charles Azzopardi, Head CSR & Events, żaru l-Knisja dakinhar li x-xogħlijiet tal-arti reġgħu ġew installati fil-post oriġinali tagħhom. Huma ngħataw merħba minn Patri Duminku Mangani, Kappillan tal-Knisja tat-Trinità Qaddisa tal-Marsa.
Ernest Agius esprima s-sodisfazzjon tiegħu, u stqarr, “Huwa tassew ta’ ispirazzjoni li tara dawn ix-xogħlijiet tal-arti storiċi restawrati għas-sbuħija oriġinali tagħhom. Dan il-proġett huwa xhieda tal-impenn tagħna biex nippreservaw il-wirt kulturali għani ta’ Malta, u huwa tassew ta’ unur li nagħtu sehemna biex niżguraw il-lonġevità ta’ dawn il-kapolavuri sabiex ikunu jistgħu jitgawdew mill-ġenerazzjonijiet futuri.”
Charles Azzopardi kkummenta wkoll dwar is-sinifikat tar-restawr. “Il-kollaborazzjoni tagħna mal-Knisja tat-Trinità Qaddisa tal-Marsa tirrifletti d-dedikazzjoni tagħna biex nappoġġjaw l-arti u l-komunità. Billi nirrestawraw dawn il-pitturi, mhux biss qed nippreservaw xogħlijiet importanti tal-arti, imma qegħdin ukoll nikkontribwixxu għan-nisġa kulturali u spiritwali ta’ Malta.”
Filwaqt li esprima l-gratitudni tiegħu għall-appoġġ tal-Bank, Patri Dominic Mangani esprima l-gratitudni tiegħu għall-isforzi tar-restawr. “Dawn il-pitturi huma parti integrali mill-istorja u l-identità tal-Knisja u tal-komunità tagħna. Ir-restawr reġa’ qajjem l-essenza spiritwali tagħhom, u aħna grati ħafna lill-Bank għall-appoġġ tiegħu fil-preservazzjoni ta’ din il-parti imprezzabbli tal-wirt tagħna.”
Ir-restawr fuq iż-żewġ pitturi li fadal, ‘San Ġwann Jgħammed lil Kristu fix-Xmara Ġordan’ u ‘Abraham Iqim it-Tliet Viżitaturi Anġeliċi’, għaddej bħalissa, u huwa mistenni li jitlesta fix-xhur li ġejjin.
